40 نصيحة لطلبة الجامعة المستجدين من استاذ الاخلاق محمد كمال
نشر الدكتور محمد كمال عضو هئية التدريس بجامعة كفر الشيخ عبر صفحته الشخصية على موقع التواصل الاجتماعى الفيس بوك " بوست " يحمل عنوان "قواعد الدراسة الأربعين لطلبة الجامعة المستجدين"
1- بلاش تعمل ناصح علي الدكتور لان وانت
رايح تعمل ناصح كانوا الدكاترة راجعين من المرة الخمسين بعد الالف فبلاش تفقع مرارتنا
لانك واحد من الاف او عشرات الالاف مروا علينا
2- الجامعة لا هي فرح ولا ماتش كورة يعني
المناظر اللي بنشوفها بتاعة المكياج مغرق وشك وواخدة اتنين كيلو لاكيه ده في فرح شيماء
صاحبتك مش في الكلية وبلاش الضجكة الرقيعة اللي بنسمعها من اخر دور. وانت بلاش البناطيل
الساقطة والمقطعة وبنطلون اختك البنت والا
3- انت جاي الجامعة المفروض عشان تحضر المحاضرات
مش عايز تحضر لا يكلف الله نفسا الا وسعها بس متزعلش لما النتيجة تطلع وعامة في كل
الاحوال هتتخرج 99% هتشتغل مندوب مبيعات او كول سنتر يعني ممكن تشتغلهم وانت طالب بردو
تبقي تخلص مع اولادك الكلية
4-يا ابني انت جاي الجامعة عشان تذاكر وتنجح
مش عشان تعلق فتكات رمش العين ولا عشان هي تصطاد عريس وشغل الافلام العربي بتاع عبد
الحليم ونادية لطفي وانك تخبط فيها والكتب اللي هي حضناها تقع من ايديها وتلموا الحاجة
سوا والنظرات والعيون والكلام ده مش بيحصل لو عملتها غالبا هنسمع صوت القلم علي وشك
واحنا في مكاتبنا
5-اوعي تصدق الافلام العربي اللي بيستخف
دمه ونظام الباشا تلميذ ده ممكن الدكتور يخليه يحزن كتير اوي، وبرجو مش هتلاقي تامر
حسني قاعد بالجيتار علي سلم الكلية والبنات بتسبله ولو قعدت علي السلم امك اللي هتسب
لك
6- عيل يطرقع بصوابعه ويقولي عايز ادخل
الحمام يا مستر هعصره اطلع منه طلبة كي جي وان
7- - اسمه محاضرة مش حصة ولا درس
8- بلاش تعمل ناصح علي الدكتور
9-- الجرس يعني فيه حريقة مش فسحة ده لو
فيه جرس انذار للحريق اصلا في كليتك
10- - اسمه دكتور ودكتورة مش مستر ومس او
ابلة واستاذ
11- الشباب والله سور الجامعة ما سور المدرسة
يعني مفيش نط من عليه مش عايز تحضر المحاضرة متحضرش وخلصت
12- اللى بيقعدوا في اخر بنج اوعوا تفتكروا
اني مش شايفكم والله شايفك خصوصا انت يا اللي بتلعب شطرنج مغناطيس مع زميلك اللى جنبك
وانتى ياللي بتاكلي فول وطعمية
13- اه بالمرة بلاش دخول علي الفيس في المحاضرة
لان معظم الدكاترة عندهم فيس بوك وشوية وتبعتوا لهم وممكن يقبلوا الاضافة وبصة واحدة
في الفيس هيعرف انكم كلكم عليه وانتم في المحاضرة
14- احنا في جامعة مش في سينما يعني الخناقات
اللى بتحصل عشان الحجز عيب وممكن تنطردوا كلكم من المدرج عشان تحجزوا مكان علي باب
المكتب وانتم بتاخدوا الكارنيهات
15- افتكر تاني اني قلت لك بلاش تعمل ناصح
علي الدكتور
16- احنا في جامعة مش جامع يعني حسب جامعتك
لو الصبيان في بنجات والبنات في بنجات التزم بالنظام ولو قاعدين مختلط يبقي بردو متعلقش
مش عاجبك شوف مكان فاضي واقعد فيه
17- لو قعدت جنب بنت دي اختك بلاش نظام
الاتوبيسات اياه عشان ممكن تقول كلمة تزعلك وتلاقي كل المدرج بيخدم معاك وهايبقي شكلك
وحش جدا
18- بلاش شغل التسبيل لزميلتك طول المحاضرة
ركز في المحاضرة عشان متتسئلش سؤال وانت سرحان ويبقي شكلك بايخ....الاهم من كل جه استحمي
والنبي عشان ريحة المدرج مش اكتر
19- علي الاقل حسسني انك جاية تكتب اي كلمتين
يعني علي الاقل معاك اجندة وقلم تكتب بيه والاجندة لها فايدة تانية انك هتقعد عليها
بدل ما تقعد علي الارض وهدومك تتوسخ وانت قاعد عند الكافيتريا ولا في الجنينة انما
جاي طرزان عشان الاجندة تقيلة علي ايدك هتزعل.
20- تفضل مكبر للمحاضرات طول السنة خد بالك
مفيش ملازم تنفع معايا ولو قلت في الامتحان ماخدناش الموضوع ده هيتعمل عليك احلي حفلة
وكل اللجنة هتضحك عليك لما تكتشف اني دكتور المادة اللى انت بتشتكي له ان دكتور المادة
مشرحش الموضوع وانت مش عارفني اصلا
21- كل في بيتكم وادخل الحمام في بيتكم
احنا الدكاترة مش بنلاقي حمامات نضيفة انت اللي هتلاقي ابقي قابلني
21- عيل ولا بنت ييجوا يقولوا لي عايزين
ناخد درس يا مستر ولا حضرتك بتدي في سنتر ايه ممكن اعلقهم في المروحة بتاعة المدرج
الدروس دي كانت ايام ثانوي هنا الكتاب والمحاضرة والمكتبة تقرا فيها مراجع يا بطل
22- نظام انت احسن دكتور في التاريخ وانت
مفيش زيك وانت بابا وماما وانور وجدي مبناكلش منه وبتقل في نظري جدا ومر علينا من العينات
دي كتير وهيتطبق عليك النظام زيك زي غيرك
23- بلاش نظام تمسك الاجندة وكتابة من اول
المحاضرة لاخرها كل كلمة بتحصل وكح الدكتور وقال الدكتور للي جنبي انت نايم ليه شيل
ايدك من جيب اللى جنبك شغل الكاتب المصري ده بيخليك متعرفش تركز في اللى الدكتور بيشرحه
24- بلاش نظام التسجيل انت مش جاي حفلة
عمرو دياب ولا تامر حسني ولا انت مخبر جاي تسجل للدكتور عشان تروح تسلم تقرير عنه
25- اوعي تنام في المحاضرة عايز تنام روح
ومتحضرش المحاضرة احسن عشان هضطر اقلق سيادتك واصحيك لان شخيرك جايب المبني التاني
26- العيال اللى بتشرب ممنوعات وبتعمل حاجات
خليعة والله لارش عليكم مياه وعملتها قبل كدة فمفيش حد يعمل كدة عيب انتم طلبة جامعة
ومحترمين وكبار
27- لو بنت وقاعدة في المدينة افتكري دايما
اهلك وانك جاية تتعلمي اول ناس هتتكلم عنك بطريقة وحشة الشباب اللي هتمشي معاهم ويرسموا
عليكي دور الحب
28- افتكر تاني اوعي تعمل ناصح علي الدكتور
29- لو فيه انشطة في كليتك شارك وعيش الجامعة
لان مش هيتكرر تاني بس اياك تأثر علي دراستك والا هتتفضح لما تخلص وهم عاملين يافطة
لتهنئتك بالحصول علي الليسانس بعد كفاح 10 سنين
30- رضا شئون الطلبة من رضا امك وابوك اوعي
تتخانق معاهم مهما حصل لانهم بردو هيطلعوا صح وانت الغلطان وهيطلع عينك
31- العيال بتوع سنة اولى بلاش شغل الثانوي
بالتخبيط على باب المدرج ويطلعوا جري..زميلك اللي كان واقف هيفضحك ويقول على اسمك اول
ما هقول له هسقطك
32- البنات بلاش الكعب العالي خصوصا اللي
في كعبه حديدة وتمشي بنظام تيك تاك وتخلي المدرج كله يبص وتشتتي لي المحاضرة هتزعلي
اوي لما يضحكوا عليكي وبلاش طرقعة اللبان شكلك بيببقي زبالة وبلاش تصوير سيلفي بوز
المعزة في الكلية الناس بتضحك عليكي يا هبلة منك لها
33- اللي بيدخلوا المدرج والمحاضرة شغالة
لو الدكتور سمح بالدخول ادخل من الباب الخلفي واقعد في اقرب مكان مش لازم تقعد جنب
صاحبك وتقوم البنج كله
34- بلاش شغل النط من فوق البنجات والكتابة
عليها بالمسامير والقلوب واحمد ومني حتي اخر العمر لان انت بتحفر في البنج ومني بتذاكر
ولما تسقط مش هتعبرك يا فاشل يا فاشل
35- العيال اللي بيجوا من الكليات التانية
وفاكرين اداب الكعب العالي والكلام القدييم موت ده وبنبقي مش عارفين نمشي منهم هنرش
مية ونكهربها
36- بلاش القعدة علي السلالم وتقفلوها وكل
اللي طالع واللي نازل لازم يستاذن حضراتكم عيب
37- الموبايلات الصيني اللي بتشغلوها علي
اغاني ويكأنكم في فرح ومشغلين اوكا واروتيجا وتشوش علي المحاضرات ابقي خليهم ينفعوك
لما تتقفش
38- بلاش نظام كل شوية ترفع ايدك ونسئل
في حاجة اتشرحت او عن حاجة لم تشرح عشان تستعرض عضلاتك وتظهر ادام الدكاترة وكدة بتتكشف
بسرعة والكل بيزهق منك...
39- هتقولي دول39 وانت كاتب انهم أربعين
هقولك جملة واحدة بلاش تعمل ناصح علي الدكتور
د محمد كمال
البوست السنوي وبردو مفيش حد بيسمع الكلام وبيزعلوا
