الخميس 28 مارس 2024
رئيس مجلس الإدارة
محمد ابراهيم نافع
رئيس التحرير
محمد الصايم
تغريدة وبوست

استاذ جامعى يعلق على اقالة 21 عضو هيئة تدريس.. فى مصر مرتبى 5700 جنيه هاعمل بهم ايه لو نزلت

الإثنين 20/يوليو/2020 - 12:21 ص
السبورة

علق الدكتور رمزى عبدالعزيز، على خبر اقالة 21 عضو هيئة تدريس بالجامعة الاردنية بسبب عدم نشرهم لاى بحث طوال 5 سنوات.

 
ونشر بوست على صفحته الرسمبة بموقع التواصل الاجتماعى فيسبوك "ناس كتيره عماله تشير وتشارك خبر إقالة 21 عضو هيئة تدريس من جامعة أردنية، بسبب عدم النشر العلمي وطبعا بيطالبوا إن ده يتطبق في مصر على أساتذة الجامعات...


قبل ما تطالبوا برفد أستاذ الجامعة، لأنه لم ينشر عدد أبحاث معين في السنة... طالبوا بتحسين دخله الأول وتحسين أوضاعه الاجتماعية ليعيش حياة آدمية هو وأهل بيته، وبعدين حاسبوه على مخرجاته البحثية بعين بجحة.. 


المعيدين والباحثين وأساتذة الجامعات المصرية... حالهم لايخفى على أحد.. عندهم أطفال وبيوت مفتوحة ومصاريف عيالهم اللي تكسر الضهر وتقصف العمر...الباحث اللي بيتعرض لكيماويات وسموم داخل معمله بسبب ضعف الإمكانيات، فيه منهم كتير بيموت بالسرطانات.. هو حضرتك عندك منظومة صحية تساعده فعلا؟؟


خلينا نقول لو الباحث او العالم خرج معاش، تقدر تقولي مرتبه كام بعد المعاش.. هل تعلم إن مكافأة نهاية خدمته العلمية والتعليمية قرابة 20 الف جنيه، ولا داعي لأذكر قيمة راتبه بعد التقاعد، حتى لا تصير فضيحة على الملأ.. 


أنا لما نزلت وكنت ناوي أرجع واستقر في مصر بعد رحلة قرابة عشر سنوات، حصلت فيهم على الدكتوراه من المانيا وكان اسمي على قرابة 30 بحث منشورين في كبريات المجلات العلمية، وانكتب عنا وعن شغلنا في الجرايد الغربية وأيضا العربية، روحت أقبض مرتبي لقيته 5700 جنيه مصري يعني تقريبا 300 يورو.. قلت في بالي هنزل عيالي الأربعة من فنلندا.. (البلد الأول عالميا في التعليم) وادخلهم مدرسة حكومي.. طب المبلغ ده هيكفيهم.. 


دروس خصوصية ولا هدفعه كهرباء ولا غاز ولا أكل وشرب وملابس ومواصلات ولا والدي المريض هساعده بإيه.. طب فعلا أنا بالمرتب ده أقدر أعيش بمفردي وسيب أولادي بره، لأن عندي ابن علاجه مش متوفر ولا أقدر أجيبه له من مصر.. أنا بره دولتين المانيا وفنلندا، أقسم بالله بيعالجوا إبني ومهتمين بيه أكتر مني ومن أمه... ماتفهمونا ياأحبة؟ ازاي نفيد وننفع أوطاننا بطريقة تحفظ كرامتنا..


إنتوا بتطالبوا شخص عقله منصب ومشغول في تدابير حاجيات حياته الأساسية والإجتماعية، وعايزينه يبدع بتفكيره وعقله وينتج لكم بحث علمي.. طب ازاي؟


والله لما رجعت كام شهر، لكان في مكتب ولامعمل ولاحتى أجهزة... طب الأبحاث هتتنشر ازاي وحضرتك إنفاقك هزيل على البنية التحتية للمعامل والأجهزة والمستلزمات العلمية والبحثية ومحجم الباحث بقوانين تمنعه من مزاولة أي نشاط آخر... العلماء والباحثين والأساتذة بحاجة لقوانين أكثر إنصافا، وعدالة إجتماعية ومساواة مع فئات بعينها في المجتمع...  


هل فعلا لازم الناس ترجع من الخارج لكي تفيد بلدها بعلمها وأبحاثها وخبرات الخارج؟ وتضحي بكل شيء بدون مقابل؟؟؟؟ ولو مأنتجوش لكم عدد أبحاث معين في السنة ترفدوهم... صح؟؟؟


طيب إيه مردود أبحاثهم ونشرهم العلمي وماهي جدواها التطبيقية الصناعية والإقتصادية على أرض الواقع، إيه الفائدة من ورقة بحثية منشورة في مجلة نيتشر أو سينس.. طالما معنديش منظومة متكاملة هتسخدمها للتطوير والإنتاج والصناعة، ولا هنقعد جنبها ونفتخر بنشرها في مجلة معامل تأثيرها مرتفع؟؟؟  


طول ما ميزانية البحث العلمي والتعليم بوجه عام متدنية ومتردية ومفيش غاية ورؤية واضحة إقتصادية واستثمارية منها.. من العبث أن تسأل عن منتج علمي...فصاحب الرسالة مهموم بتدابير أبسط حقوقة، بالعيش كريما