Advertisements

هو هو يعني اية امتحان..؟ واية الهدف منه؟

الأربعاء 17/فبراير/2021 - 12:04 ص
 
Advertisements

ولما تعمل امتحان واحد مجمع لكل المواد بورقة واحدة هتقدر تجيب فيه وحدات دراسية متنوعة بكل المواد في زمن لا يتجاوز تلاتة او اربعة ساعات..؟

هو مفيش حد من كليات تربية يقول لهم غلط الكلام دة... ومينفعش يتعمل امتحان مجمع بورقة واحدة تحكم بيه على محتوى مواد ترم كامل عشان فيه فروق فردية...!!

ولازم الأول تعمل كتب مدرسية يكون فيها اسئله شامله بالنوعية دي، والمدرسين يتدربوا الاول عليها والخطوة التانية يدربوا الطلاب قبل ما حد يفكر انه يخليها رسمي في امتحان فجأة كدة..؟!

محدش قال ان النظام دة عشان يتعمل لازم يكون بشكل شهري ويتاخد متوسطات الامتحانات، وتكون الامتحانات دي شامله للوحدات الدراسية كلها ومتنوعة..!! ومينفعش تتعمل فجاة ويتحكم بيها على استيعاب طالب عن ترم كامل...!

يعني لو كانو قالو ان مفيش ترم وهنتحول لنظام الامتحان دة وهيطبق لاخر 3 امتحانات، مثلا بمتوسطات كان ممكن الكلام يكون مقنع..
يعني طالب مذاكر كل منهجه وفاهم ومستوعب وحدات دراسية عديدة ووحدة دراسية معينه مستواه ضعيف فيها.. وحظه ان السؤال الأوحد اتي منها.. هتقدر تقول عليه انه فاشل ويعيد السنة...؟ هو مش فيه حاجة اسمها مواصفات الورقة الامتحانية ونظم قياس وتقويم وتقييم وأهداف تعليمية وقدرات بني ٱدمين مختلفة وفيه أطفال عندهم صعوبات تعلم...

هو لية الناس دي بتتعامل مع البشر على انهم ٱلات هندسية ولا روبوتات، هيدخلو لهم البرنامج ويطلبوا منهم إجابة..؟!! الناس دي محتاج تعرف يعني اية تربية وعلم نفس وطرق تدريس ونظم قياس وتقويم وتقييم وفروق فردية...

الامتحان هو قياس مدى إتقان الطالب لمحتوى المقرر ولعدة مفاهيم و لعدة وحدات دراسية؟

الهدف منه تقييم مدى قدرة الطالب على تحقيق الأهداف التعليمية الموضوعة، مسبقا لتتأكد الدولة ان الطالب استوعبها و قادر للانتقال للصف الدراسي التالي ليمنح اعتراف رسمي اسمة شهادة..

انت هتقدر تقيس اية في زمن مختصر كدة بسؤال ولا اتنين...؟

هتقدر تحكم كدة ان الطالب اللي تقديره اقل من النصف هو فاشل ومذاكرش ويسقط؟ ولا الامتحان انت ركزت فيه على نقطة واحدة عشان تختصر بس , وهو كدة مقياس للنقطة دي بس ومش مقياس لكل المنهج ...؟!!

اللي يشوف مناهج المرحلة الاساسية للوزارة سينبهر لما بها من عبقرية فذة وتخطيط مدروس بدماغ عالية جدا، قد تكون منقوله من واحد تايه في كوكب زحل .. !! فعلى سبيل المثال ستجد دروس اللغة العربية تعامل تلاميذ الصف الرابع الابتدائي على انهم كيجيهات، فطبيعي انك تجد درس بعنوان "طيور لا تطير" فالديك الرومي طائر بس مبيعرفش يطير ... والبطريق طائر من غير ريش لا يطير ..!

بينما في مادة الساينس بيعاملوا نفس الدفعة على انهم في أولى طب واول درس بعنوان digestive & respiratory system.. الجهاز الهضمي والتنفسي وتشريحهم ووظائف كل جزئية فيهم

بينما دروس الماث للصف السادس الابتدائي تعاملهم على انهم في كلية تجارة، وطبيعي ان تجد سؤال عن حساب العائد من ايداع مبلغ ما في البنك بفائدة بنكية ربع سنوية بقيمة كذا واحسب صافي الربح بعد كذا شهر .

اما كمبيوتر سادسة ابتدائي بيعاملوهم على انهم "صم بكم عمي لا يفقهون" بيتعلموا ازاي يغيروا التاريخ والساعة واللغة وازاي يوصل البرنتر بالكمبيوتر ويفتح صفحة الاكسبلورر..

الاطفال برة بيتعلموا برمجة واحنا لسة بنعلمهم يغيروا الساعة منين.. ونظري كمان عشان طبعا انت عارف المعامل المتطورة..

اما في التربية الدينية فعليهم حفظ سورة الجن وفهم معانيها ......!!!

اسمع حد بأة يكلمني عن تابلت ولا تطوير تعليم... ولا ازاي التلاميذ يحبوا التعليم...!!

هنزل لهم الجن الازرق من زحل ..

Advertisements

تعليقات Facebook