الجمعة 29 مارس 2024
رئيس مجلس الإدارة
محمد ابراهيم نافع
رئيس التحرير
محمد الصايم
أخبار الرياضة

قصة زواج حازم إمام وقدرية.. من ملجأ الأيتام وكان شكلي غريب قوي زي الحرامية

الثلاثاء 30/مارس/2021 - 02:21 م
السبورة

استضافت  إسعاد يونس، في برنامج «صاحبة السعادة» المذاع عبر فضائية «dmc»، لاعب نادي الزمالك السابق وعضو مجلس النواب حازم إمام وزوجته قدرية داوود، للحديث حول تعارفهما والمقابلة الأولى وقصة حبهما وزواجهما وعن الخطوبة والصدفة التي جمعت بينهم وهذه التفاصيل نرصدها لكم كما يلي:

قالت قدرية: «مكنتش أعرف يعني ايه لاعب كرة بحجم حازم وبعدين بدأت أعرف لما بدأنا نتعرف ببعض ومكناش بنعرف ننزل والموضوع كان صعب وأحسن حاجة إن العلاقة كانت سريعة جدا من أول الخطوبة».

وعن الصدفة التي جمعتها بحازم إمام «كان فيه ملجأ في المعادي وكنا عاوزين نجيب حد مشهور وكان فيه مغني بس مكنش فاضي وقولت لهم إحنا نكلم حازم إمام أنا مكنتش أعرفه لكن أصحابي كانوا يعرفوه وكان عمري ما شفته ولا أعرفه وأخدت نمرته وخليت حد ما بينا يكلمه ومروحناش ملجأ ولا أي حاجة وشفنا بعض في العربيات في المهندسين وقابلته أول مرة وكنت في عربيتي وهو بعربيته وسلمنا على بعض عادي».

تكلم حازم عن بداية تعارفهما قائلًا «اتصلت كذا مرة وقلت لها انتي جبتي رقمي منين قالت من فلانة وبعدين كلمتني كذا مرة عشان نروح الملجأ وبعدين كنت خلصت التمرين وشفتها أول مرة في شارع سوريا بالمهندسين وكان شكلي غريب قوي ولابس آيس كاب زي الحرامية ودقني طويلة وشكلي يخض».

وعن سبب اتخاذه قرارا بخطبتها قال حازم إمام «لقيت نفسي مهتم ولقيت دماغها قريبة من دماغي وقدرية مش بتاعت خروجات قوي لكن بتحب تخرج وبتحب تتفسح لكن مش بتاعت نايت لايف وبتاعت سفر وحاجات بحبها ومكنتش بتزن وأنا بحب الناس اللي بتريحني ولقيتها من النوع ده من أول يوم وبجد لقيتها طيبة جدا في الحتة دي ومش زنانة وأنا مبحبش الست الزنانة»، مشيرًا إلى أن زوجته «بتحب تسافر وتتعشى برة ولو أنا معنديش حاجة نخرج نفطر مع بعض وهي بتحب نخرج نعمل حاجات مع بعض».

واستكمل «أنا قولت لماما فيه حد وكده قالت لي اسمها إيه قولت قدرية قالت اسم غريب وقديم شوية طب بتدرس فيه قولت لها الجامعة الأمريكية كشت قوي وقالت لي هتبقى كول وعايشة في الدور وكده وبعدين ماما كلمتها في التليفون وقرينا الفاتحة».

وحكت قدرية داوود رد فعل طريف لوالدها حينما أخبرتها أن حازم إمام يريد خطبتها والزواج منها: «احنا مش بيت كروي ولما عرضت الفكرة على بابا كانت كبيرة وبابي افتكر هقوله مهندس وانا قولتهاله على طول بدون مقدمات.. عارف حازم إمام قالي اه بتاع الكورة قولت اه هو ده ورجع تاني قالي حازم إمام مين وفضل يسألني أسئلة وفي الآخر قالي خليه يجي لي بكرة قولت له مش هينفع عشان هو معسكر ومش هينفع أكلمه وكلمت حازم قالي عندي ماتش وقولت له مش هقدر أقوله عندك ماتش»

وحكى حازم إمام كواليس المقابلة الأولى مع حماه قائلًا: «أنا كنت عايز أتجوز بدري عشان الموضوع ده مهم جدا للفن ولاعيبة الكورة، ولما لقيتها هي قولت لها كلمي بابا وروحت له المكتب وروحت العمارة وأنا داخل لقيت الكهرباء قطعت فضلت واقف شوية لحد ما النور رجع ودخلت لعمو لقيته لذيذ وقعدنا نتكلم في الكورة وفكني وقعدنا نتكلم وقالي خلاص شوف ونحدد يوم ونخلي بابا وماما يشرفونا وأنا يومها كنت متعور وكنت لابس سابو».

وحكى إمام، أن الخطوبة استمرت لمدة عام ولكنه فشل هو وزوجته في تذكر موعد خطوبتهما وعقد قرانهما وزفافهما.