الجمعة 29 مارس 2024
رئيس مجلس الإدارة
محمد ابراهيم نافع
رئيس التحرير
محمد الصايم
منوعات

هل كان الهكسوس موحدين والمصريين أشرار وكفار؟.. تعرف علي حقبة حكم الهكسوس لمصر

الأربعاء 07/أبريل/2021 - 06:49 م
أرشيفية
أرشيفية

نشرت صفحة تاريخ مصر القديم عليموقع الفيسبوك، تدوينة بشأن حقبة حكم الهكسوس لمصر والتي تضمنت الآتي:

مبدئيا مفيش كتاب تاريخى بيقول ان الهكسوس اتوا بجيش واحتلوا مصر، كل دارسى الاثار والتاريخ عارفين ان الهكسوس دخلوا مصر عن طريق هجرات وبقوا يستدعوا قرايبهم وقرايب قرايبهم علشان ينضموا لهم فى استيطان مصر، دول كانوا بيبعتوا يجيبوا نساء من آسيا يتجوزوهم.  "وده هتلاقيه لو قريت موسوعة سليم حسن اللى  اتكتبت من يجى ٨٠ سنة مش اختراع او اكتشاف جديد".

طيب جت منين ان الهكسوس دخلوا مصر بالحرب؟

الحقيقة ان المصدر الرئيسي للكلام ده هو يوسفيوس فلافيوس المؤرخ اليهودى واللى برضو قال ان الهكسوس منهم بنو اسرائيل، وفى كل كتاباته كان بينصر بنى جلدته على حساب المصريين، واللى ساعد على انتشار الرؤية دى كان رواية اديبنا العالمى نجيب محفوظ كفاح طيبة فبالتالى الناس اعتبرت الكلام ده مسلم بيه فلما يطلع حد يقول الكلام ده ويتفلسف اعرف انه مقرأش كتاب واحد.

الهكسوس دخلوا مصر على فترات متتالية واستوطنوا شرق الدلتا تحديدا كاكبر معاقلهم وكانت لهم اذرع ومواليين فى اماكن كتير فى مصر، بل ان نفوذهم وصل للمنيا كمان وده خلى الملك احمس بعد طردهم يقضى على الاذناب دى.

الوضع كان كالتالى، مستوطنين من اماكن كتير فى اسيا كونوا مجتمعات منغلقة وجيتو مقفول جوه مصر وعلشان ضعف السلطة المركزية وتزايد نفوذهم وقوتهم العسكريةوتعاملوا مع المصريين بالقسوة والعنف بل وفرضوا ضرايب على حكام مقاطعات فى مصر، اتمسكن لحد ما اتمكن زى ما بنقول بالعامية،  اصبحوا شوكة فى ضهر الدولة المصرية والكفاح ضدهم كان من قبل سقنن رع، فى ملك مشهور اتدفن فى ابيدوس اسمه سنب كاى كشفوا عن مقبرته فى ابيدوس وده مات فى معركة فى الفترة دى، كمل بعده سقنن رع واسرته علشان يطردوهم خارج مصر عن طريق معارك حربية ونجحوا فعلا، والهكسوس فضلوا مترقبين لحد عصر تحتمس الثالث وكانوا عاوزين يرجعوا يحتلوا مصر وتحتمس هو اللى قضى على احلامهم تماما، يعنى كانوا عدو اجنبى مباشر وواضح وصريح ما اخفوش عدواتهم دى نهائى.

اما بالنسبة للكلام الغريب اللى بيقول ان الهكسوس كانوا موحدين، فى ناس بتتكلم فى التاريخ بلا معرفة تحت ستار الاسلام "والاسلام منهم برىء" بيقولوا الهكسوس كانوا موحدين والمصريين اشرار وكفار، والحقيقة عاوز افهم فين التوحيد فى سرقة الاله المصرى ست وعبادته؟ فين التوحيد فى انهم يتدفنوا فى توابيت على شكل خنازير؟ فين التوحيد فى انهم يدفنوا الاحصنة معاهم؟ فين التوحيد اللى بيدفنوا فيه نفسهم جوه اوانى مسطحة؟ ماهو ده اللى عمله الهكسوس، فى المقابل المصريين امنوا بوجود اله وحساب وعقاب وبعث وخلود ، فمين الكفار بالزبط حتى بالمقاييس العجيبة للناس دى ؟