الخميس 28 مارس 2024
رئيس مجلس الإدارة
محمد ابراهيم نافع
رئيس التحرير
محمد الصايم
تغريدة وبوست

10 اسئلة واجابتها شافية لكل ما يدور فى عقل طالب الثانوية العامة

الخميس 03/يونيو/2021 - 08:07 م
الرئيس عبدالفتاح
الرئيس عبدالفتاح السيسى واجتماعه مع طارق شوقى

استعرض الكاتب الصحفى احمد حافظ، المعنى بشئون التعليم 10 اسئلة واجابتها تشمل كل ما يدور فى عقل طلاب وطالبات الثانوية العامة، واولياء الامور، مرسلا برسالة طمأنة لجميع الطلاب، خاصة بعد تدخل الرئيس عبدالفتاح السيسى فى شكل وآداء امتحانات الثانوية العامة.


ويستعرض موقع السبورة الشرح المبسط الذى نشره الكاتب الصحفى احمد حافظ على صفحته الرسمية بموقع التواصل الاجتماعى فيسبوك والذى جاء كالتالى:


أولا: ماذا يعني قرار الرئيس السيسي، بالدمج بين النظام الورقي والإلكتروني في امتحانات الثانوية العامة؟
الإجابة: حسب كلام السفير باسم راضي المتحدث باسم رئاسة الجمهورية- في رده على سؤال وصله على صفحته- سوف تكون الأسئلة متاحة أمام الطالب بشكل ورقي وإلكتروني، والطالب من حقه الاختيار في استخدام الورقي أو الإلكتروني.. يعني حضرتك كطالب هيكون معاك التابلت عليه الأسئلة وورقة أسئلة مطبوعة لنفس الامتحان.. عايز يبص في الورقة ويحل ماشي عايز يبص في التابلت ويحل برضو ماشي.


ثانيا: هل معنى كده إن الطالب هيكون معاه ورقة أسئلة ومش هينتظر لما التابلت يعطل أو المنصة يحصل فيها مشكلة تقنية؟
الإجابة: حسب كلام المتحدث باسم رئاسة الجمهورية.. أيوة الطالب هيكون معاه الاتنين (تابلت وورقة أسئلة).


ثالثا: طب بالنسبة للطلبة المنازل والراسبين والباقيين للإعادة؟
الإجابة: امتحاناتهم ورقية.. وبرضو امتحانات الطلبة النظاميين إلكترونية مع ورقية.. تقريبا الاتنين متساويين.


رابعا: هل التابل هيكون متصل بالإنترنت؟
الإجابة: لا.. مفيش إنترنت في اللجان، والتابلت هيشتغل على المنصة الداخلية للمدرسة.


خامسا: طب الطالب هيحل فين.. سواء الورقي أو الورقي الإلكتروني؟
الإجابة: الطالب المفروض إنه هيجاوب في البابل شيت علشان التصحيح الإلكتروني.. ولو عايز يجاب مرة واحدة على التابلت من حقه، هيكون قدامه بديلين.. بديل إجابة على الأسئلة بشكل إلكتروني.. وبديل إجابة على الأسئلة بشكل ورقي.. هو حر.


سادسا: هل فيه أسئلة مقالية سواء للورقي أو الإلكتروني ورقي؟
الإجابة: جميع الأسئلة اختيار من متعدد لتسهيل مهمة التصحيح الإلكتروني.


سابعا: إيه البابل شيت ده؟
الإجابة: ده رقة مرقمة بنفس عدد أسئلة الامتحان.. يعني لو الامتحان 50 سؤال هيبقى في البابل شيت 50 مكان للإجابة.. ومكان الإجابة ده هيبقى عبارة عن أربع دوائر.. تظلل على الدائرة الصح حسب السؤال.. بتوضيح أكتر.. لو السؤال رقم خمسة في الامتحان بيقولك مصر كام محافظة – أنا بقول مثلا- ومطلوب منك تختار إجابة واحدة من الاختيارات الأربعة المتاحة.. حضرتك هتروح للبابل شيت وتظلل الدائرة اللي مكان الإجابة الصح.. يعني لو الإجابة الأولى هي الصح تظلل الدائرة الأولى قصاد رقم خمسة.. لو الإجابة التانية هي الصح تظلل الدائرة التانية، وهكذا.


ثامنا: لو حضرتك جاوبت إجابة على التابلت وجاوبت إجابة تانية في البابل شيت لنفس السؤال؟
الإجابة: هتاخد الدرجة على إجابتك في البابل شيت لأن ده المستند والوثيقة اللي انت عاملها بإيدك.


تاسعا: طب ونتيجة الامتحانات؟
الإجابة: النتيجة مش هتتأخر زي كل سنة، لأن التصحيح إلكتروني.. البابل شيت اللي حضرتك حليت فيه، أو حتى التابلت اللي حضرتك حليت فيه.. هيتصحح إلكتروني.. يعني الإجابة هتعدي على جهاز ماسح ضوئي هيقرأ إجابتك في (الاختيار من متعدد) لو صح هتاخد الدرجة لو غلط هتاخد صفر.


عاشرا: طب الرئيس كده عمل إيه؟
الإجابة: الرئيس حط لك كل الحلول اللي تريحك.. عايز تقرأ الأسئلة من الورقة ماشي، عايز تقرأ الأسئلة من التابلت ماشي، عايز تحل بابل شيت براحتك، عايز تحل على التابلت برضو براحتك بس بابل شيت مهم جدا ودي نصيحة لوجه الله.. من الأخر: حضرتك ضامن إنك لما هتروح الامتحان، الأسئلة مش هتغيب.. لأ دي هتكون موجودة ورقية وإلكترونية، ولما هتيجي تحل متقلقش إن إجابتك ممكن تطير أو مش تتحفظ، لأنك هتكون حر في اختيار إجابتك ورقية أو إلكترونية.. اللي اتقال النهاردة كويس ومحترم. أتمنى ننسى ونركز في الامتحانات طالما رئيس الدولة أخد قرارات تطمنك.


ملحوظة هامة: جميع الطلاب - نظاميين منازل راسبين- هيتدربوا على طريقة الإجابة من خلال بابل شيت في الاختبار التجريبي الثالث، يونيو المقبل.