الجمعة 29 مارس 2024
رئيس مجلس الإدارة
محمد ابراهيم نافع
رئيس التحرير
محمد الصايم
منوعات

البقاء لله.. وفاة خال الزميله بسمة رمضان

السبت 11/سبتمبر/2021 - 11:17 ص
أرشيفية
أرشيفية

أعلنت الزميلة بسمة رمضان الصحفية بجريدة المشهد، عن وفاة خالها فؤاد محمد السيد الضهراوي حيث تم تشييع الجنازة أمس الجمعة ودفن الفقيد في مقابر العائلة في قرية دمسنا بمحافظة البحيرة.

وتتقدم أسرة تحرير موقع السبورة بخالص العزاء للزميلة بسمة وللعائلة في فقيدهم الراحل إن لله وإن إليه راجعون

وقالت بسمة عبر تدوينة لها علي صفحتها علي موقع "فيسبوك" لأول مرة مكنش عارفه انا ممكن أكتب ايه، كنت متخيله أن اكتر حاجه ممكن توجع قلب حد أنه ينفصل عن حد كان بيحبه وانتهت الحياة بينهم، لكن من وقت ما بدأت تتعب انا مش بس حسيت بوجع قلبي لاء انا حسيت بقهر وشفت قد ايه الدنيا ديه ما تسواش حاجه، وان أوقات كتير العلاقات والمناصب بتكون عاجزه عن أنها تعمل حاجه أما الإنسان بيكون خلاص خلصت حلول الأرض معاه.

 وعرفت كمان يعني ايه دموع حقيقية أما انضميت لأهالي مرضي الكانسر، والرعاية المركزة، كان لسه بدرى يا فؤش فؤاد محمد الضهراوى  عن انك تمشي وتسيبنا، انت كسرت ضهري ووجعت قلبي، حتي اللحظه ديه بحاول اهرب من العزاء بتاعك، لأن بكل بساطة انا مش مصدقه انك خلاص مشيت، معقوله ياصاحبي مش هنتخانق تاني علي طبق السلطة اللي بتحبها بالفلفل الحار واللي بحبها من غيره، معقوله مش هاجي اخبط علي بطنك واقولك عز جدو، وانت تقولي هو انتي يابت ملكيش أهل تأكلي عندهم وجايه تأكلي في بيت أبويه، معقوله مش هنتخانق علي خروجه حديقه الحيوان واقولك ياعم ابوس ايدك غير ام الرحلة السوده ديه ونضحك.

 كده تعملها فيا وتمشي من غير ما أودعك حتي، الخال طلع فعلاً والد وانت كنت ونعم كل حاجه حلوه والله، مبسوطة لأنك في مكان احسن من الدنيا ديه، فخوره بيك يا حبيبي وبحب الناس ليك وبجنازتك اللي الكل بيحكي عنها، واللي انا معرفتيش اشوفها ولا أحضرها،  ربنا يجعل مرضك في ميزان حسناتك يا حبيبي، كنت خفيف و متقلتيش علي حد في تعبك ياحبيبي، وحشتني وهتوحشني العمر كله لكن البقاء لله وحده، مشيت من غير ما اقولك مع السلامة لكن قلبي بيدعيلك وهيفضل يدعيلك طول العمر.

انا كنت جيالك أما عرفت بالخبر اللي مش مصدقاه لحد دلوقتي لكن اقسملك ما لاقيت طيران، ربنا يدينا الصبر والقوه علي فراقك يا حبيبي، كنت سند للدنيا كلها وكان الكل بيحبك وكنت خفيف الروح وطيب القلب، هعزى نفسي في وفاتك ياحبيبي لحد ما نتقابل تاني، عارفه أن ربنا بيحبك وانك في مكان أحسن مننا بكتير، خالو ديه اول ليله ليك بعيد عننا خالص ربنا يثبتك عند السؤال ويجعل قبرك روضة من رياض الجنه ️مع السلامة يا جدع مع السلامة يا صاحبي مع السلامة يا حبيبي انا لله وانا اليه راجعون