الأحد 14 يوليو 2024
رئيس مجلس الإدارة
محمد ابراهيم نافع
رئيس التحرير
محمد الصايم
منوعات

55 سؤال هتجاوب على 42 باريحية و13 للمتميزين

كيف تحل مادة اللغة العربية فى امتحانات الثانوية العامة 2024.. وانت بتجاوب احترم الأسئلة ولا تخاف منها

الجمعة 21/يونيو/2024 - 01:02 ص
كيف تحل مادة اللغة
كيف تحل مادة اللغة العربية فى امتحانات الثانوية العامة 2024

تنطلق امتحانات الثانوية العامة 2024، غدا السبت للمواد المضافة للمجموع وتبدأ بمادة اللغة العربية لجميع الشعب ووجه وائل السواح كبير معلمى اللغة العربية بمدرسة أم الأبطال  بمحافظة الجيزة العديد من النصائح لطلاب الثانوية العامة 2024، مطالبا جميع الطلاب بأحترام امتحان اللغة العربية وهناك فرق كبير بين احترام المادة والخوف منها 

ويقدم موقع السبورة وجبة دسمة من مراجعات ليلة الامتحانات فى اللغة العربية وجميع المواد امتحانات الثانوية العامة يقدمها صفوة خبر المواد للأطلاع عليها اضغط هنا  ووللأطلاع على مراجعات الفيديو على الفيس بوك أضغط هنا نتمنى أن لا تفوتك 

حكاية امتحان الثانوية العامة 2024 فى اللغة العربية من الألف للياء

أوضح وائل السواح ان امتحانات الثانوية العامة 2024 فى مادة اللغة العربية تتكون من (55) سؤال منهم 42 سؤال يمكن حلهم بأريحية والـ 13 سؤال الاخريين اسئلة للتمييز بين الطلاب، والمهم تقرأ السؤال وتفهمه قبل الأجابة عليه 

أولا - لست من هواة التهويل ولا التهوين، وعلشان مش نطول على بعض، اطمئن واحترم امتحان اللغة العربية  2024 ولا تخف منه، فيه فرق كبير بين الاحترام للمادة والخوف منها.

طيب اطمن ليه ؟ وإزاي ؟

جايلك ( 55 ) سؤال، منهم ( 42 ) سؤال بإذن الله تحلهم بأريحية، وبالبلدي الكل ياكل فيهم عيش لحد كده كويس ؟

طيب تمام، هاا وبعدين ؟     باقي لك كام سؤال ؟

سامعك، قول: ( 13 ). تمام والـ ( 13 ) دول أسئلة للتمييز بين الطلاب، والفرز، ماهو الامتحان مش هييجي كله كده.. فاهمني ؟

يعني الامتحان لازم يميز الطالب الفائق من الجيد جدا من الجيد، ف ال ( 13 ) دول للتمييز بين مستويات الطلاب.

نسيت أقولك: ال ( 13 ) دول متفرقين ومتوزعين على فروع اللغة العربية ( توزيع نسبي ) حسب أسئلة كل فرع وعددها، يعني مش في فرع واحد لا مؤاخذة 

المهم بقى يا بطل 

تقرأ السؤال بعناية فى امتحانات الثانوية العامة 2024 تاني بعناية وتجيب حسب المطلوب منك

مثلا في النصوص بيقولك بعد قراءتك للبيت الرابع يبقى ترجع للبيت الرابع مش كل الأبيات وتعيد قراءته كويس وتبدأ تجيب أنت حسب فهمك، وبعدين تبص ع الاختيارات لو لقيت الإجابة اللي أنت جاوبتها اختارها ع طول. طيب لو ملقيتهاش ؟ خد القريبة جدا من إجابتك.

نسيت أقولك: تشعر بشعور الشاعر مش شعورك أنت، وتتذوق بذائقة الشاعر مش تذوقك ورأيك أنت.

وكذلك ف القراءة، مثلا بيقولك: في ضوء الفقرة الثالثة يبقى ترجع للفقرة وتضربها ف الخلاط، وتشوف ملخصها إيه ؟ وإيه الزتونة؟ وتبدأ تعمل نفس اللي قلنا عليه ف القراءة 

التعبير المقالي تكتبه ف الأول، ياخد منك ( ربع ساعة ) كفاية أوي دا هما 8 سطور، وراجع التعبير زي ما مدرسك قالك وفهمك 

تخش ع النحو فى امتحانات الثانوية العامة 2024 تخلص الجمل الحلوة، ولو قابلتك جملة صعبة محتاجة تفكير اعمل قصادها علامة × وخش ع اللي بعدها وانجز. امتحانات النحو اللي فاتت أنت فارمها كلها علشان فيه أفكار هتتكرر. الحق نفسك لو محلتهاش الحق حلها

والله جايلك منها ( أختها )

خلص أسئلة التعبير اختيار من متعدد  فى امتحانات الثانوية العامة 2024. وبعدين أسئلة الأدب، وكتاب المفاهيم هيساعدك فيه إن شاء الله، وركز وأنت بتختار ممكن جدا كلمة واحدة تكون مفتاح الإجابة، فركز 

وبعدين نصوصك الحلوة الشعري والنثري زي ما اتدربت مع أستاذك اشتغل. اسم الشاعر بيفرق معاك، لو ما عرفتش مثلا هو تبع أي مدرسة ؟ بص ع الأسئلة للآخر هتعرف مدرسته ووجه البوصلة ع المدرسة وسماتها 

ولما يسألك من حيث المضمون، ركز فى امتحانات الثانوية العامة 2024، علشان هو هيرمي لك واحدة من حيث الشكل، وواحدة من سمات مدرسة تانية

استبعد الاتنين دول، وابدأ اختار ما بين الاتنين التانيين بهدوء. والعكس صحيح لو سألك من حيث الشكل مثلا 

والنص النثري: شوف وركز على خصائص ومميزات وعناصر كل فن سواء مقال أم قصة قصيرة أم آخر حاجة القراءة: عندك قطعتين: واحدة أدبية والتانية معلوماتية. اقرأ الموضوع كله على بعضه قراءة متأنية بفهم وضع لكل فقرة عنوان وفكرتها إيه ؟

وروح اقرأ السؤال، وارجع للفقرة المشار إليها واقرأ سريعا وقول مع نفسك إجابة السؤال واختار، لو مالقتش اختيارك دور ع الأقرب له زي ما قلت لك.

آه، بص: ما تحلش أسئلة بقى اليومين اللي باقيين دول وتشتت عقلك وترهق ذهنك ف أسئلة كتب خارجية، خلاص المرحلة دي وقتها خلص. دي فترة تجميع معلومات، شوف الفرع اللي ناقصك وكمان، وكل واحد طبيب نفسه، وعارف علته، ونقاط ضعفه، أسرع وعالجها 

اوعى تحط دماغك ع المخدة وتحس إنك مقصر ف حق نفسك، هتزعل بعدين زعل جامد، بس هيكون الوقت فات   

هي دي حكاية الامتحان من الألف للياء