الخلايا السلبية.. وكلام الناس بالشارع

مصر ام الدنيا دايما وللابد.. احنا ف حب بلدنا مصر.. مهما اختلفنا الرأى والتعبير والتفكير.. نحن فى أرضها وتحت رايتها.. تحيا مصر للأبد.. لكن نتمنى ان نصون بزيادة ام الدنيا ونحافظ على النعمه التى نعيش فيها.. وطن قوى مستقر.. بنتحسد من كل اللى حوالينا من دول محيطة على نعمة ربنا الينا جميعا ( مصر المستقرة القوية ) حمى الله مصر.. شكرا عزيز مصر.. هناك استفزاز للشارع قد يكون ملحوظا وقد يكون كلامنا تنبيه للقيادات الى خطورته بخلاف قضايا اخرى قد تكون مكتومه او غير محسوسة.. 

نتمنى الخير لبلدنا ونتمنى من الجميع الوعى والصبر.. لان عزيز مصر دايما يوصينا( خليكم ايد واحدة يا مصريين ) هناك امور اقتصادية وتعليمية مستفزة للناس..  والصبر كله حبا فى العزيز الغالى عزيز مصر.. ح تقولى زى ايه.. اقولك نتكلم كام نقطة اقتصاد وتعليم لان هناك تصريحات واجراءات يجب ان تكون أكثر مسؤولية نحو الناس والشباب مثلا..

١- تصريحات رؤساء بعض العناصر الانتاجية بعد زيادة اسعار المحروقات ان هناك زيادة فى سعر المنتجات تصل الى.. وان سعر كيلو.. ح يوصل ل هو انت طالع بالتصريح بتاع حضرتك بناء على ايه.. وليه التصريح ف الوقت ده.. وهو انت كدا مع الدولة ولا بتظهروا وقت الازمات لتسخين الناس..

٢- تلميحات مواقع التواصل عن زيادة الحد الادنى للاجور.. عند الناس اصبح مثار سؤال آخر.. هل هناك اسعار اخرى ح تزيد.. لان كل تحريك للاجور يصاحبها زيادة فى اسعار المحروقات او الكهرباء والمياه او الخدمات.. والموظف كل زيادة بيبقى قلقان من ضريبة كسب العمل.. لان كل زيادة مرتب يقابلها زيادة استقطاع ضريبة كسب العمل ما لم تتدخل الدولة وتزيد حد الاعفاء الضريبى.. والموظف من جواه.. اعتبروني مستثمر وادونى مزايا ضريبية.. اتمنى عدم ترك الناس لمواقع التواصل فى هذا الشأن رغم جهود الدولة الكبيرة من اجل الصالح العام

٣- فى التعليم.. هناك شباب تعانى خطر الموت.. وابرز مثال.. حادث المعلمين فى طريق جرجا - البلينا بسوهاج امس وربما حوادث ومضايقات  لم يتم الإفصاح عنها إعلاميا فى محافظات آخرى.. الى متى يعانى الشباب.. اداراتهم الاصلية فيها عجز لكنهم يعملون فى ادارات اخرى لان العجز أشد.. الى متى تظل كثير من المديريات تنفذ ذلك الامر رغم غضب الشباب والاهالى من ذلك الأمر.. وتلاقى السلبيين شغالين على مواقع التواصل.. وكل الاتهامات للدولة والسبب الروتين الموروث فى كل المحافظات وهى الأماكن الاشد عجزا.. طب شغل الناس دى فى اداراتها طالما فيها عجز والاشد عجزا شغلها بالحصة من أبناء المكان.. انتو فتحتوا باب هجوم عليكم وعلى الدولة.. طب ليه ؟ لذلك اتمنى تدخل سياسى حكومى عاجل فى ذلك الشأن..

٤- شباب المعلمين فى المرحلة الخامسة لمسابقة ٣٠ الف معلم.. ليه م نعملش تعجيل للاجراءات حتى يتسلموا اعمالهم مع بدء الفصل الدراسى الثانى.. طالما فيه عجز معلمين.. ننجز شوية فى الاجراءات.. لانك بتفتح باب كلام للخلايا اياها.. هم لاقيين.. علشان يسلموكم الشغل.. دا رفعوا سعر.كذا وكذا علشان يسدوا العجز.. تأخر او بطء بعض الاجراءات بيفتح مجال للسلبيين يتكلموا..

٥- يجب ان تتدخل الدولة فى قرار لوزارة التعليم.. كل يوم واجبات تقييمات اداءات.. الطالب فى مختلف المراحل مضغوط والأسرة مضغوطة.. انا ولى أمر اتمنى التخفيف.. مفيش يوم من غير تقييم واداء وواجب.. لغاية امتى ح افضل مضغوط.. السنة كلها كل يوم مضغوط..  وبنتى تقولى بكرة عندى تقييم كذا وأداء مادة كذا او اختبار مادة كذا.. أدوا الطفولة دورها.. الكل مضغوط.. أسرة وطالب ومعلم ومدرسة.. والسبب فرحة المسؤولين ان الطريقة دى جذبت الطلاب للمدرسة.. طب مفيش طرق تانى غير كدا ؟ حمى الله مصر.. وربنا يقوى الاجهزة الأمنية والسيادية على امور الداخل والخارج.. بصراحه ربنا يكون معاهم ويقويهم ويحميهم..