إزاي نخلي أولادنا يلتزموا بـ التمارين الرياضية؟

التمارين الرياضية.. قال  كوتش أحمد نجيب مدرب رياضي متخصص ومؤسس Little Champ Sports Academy في منشور علي صفحته علي موقع التواصل الاجتماعي "فيس بوك" على مدار شغلي مع الأطفال في التمرين، دايمًا بشوف نفس السؤال من الأهالي:“ابني بيبدأ بحماس… وبعد أسبوعين يزهق. نعمل إيه؟”

التزام الأطفال بـ التمارين الرياضية

والحقيقة إن التزام الأطفال بـ التمارين الرياضية مش موضوع بسيط، لكنه في نفس الوقت مش مستحيل. الموضوع محتاج طريقة معينة في التعامل… ومحتاج نفهم طبيعة الطفل قبل ما نطلب منه يلتزم.

التمارين الرياضية للأطفال مش رفاهية… دي أساس تربوي

من خلال شغلي اليومي، بشوف قد إيه التمارين الرياضية بتغيّر في شخصية الطفل:
• الثقة نفسها بتعلى.
• تركيزه في المدرسة بيتحسن.
• سلوكه في البيت بيهدى.
• بيعرف يعني إيه التزام واحترام تعليمات.
• وبيتعلم يحط هدف ويتعب علشانه.

عشان كده بقول لكل ولي أمر: التمرين مش “وقت يضيع”… ده استثمار بيبان تأثيره بعد شهور وسنين.

ليه الأطفال بتقطع التمرين بسرعة؟

من خبرتي، أغلب الأطفال بتملّ بسرعة بسبب:
• اختيار لعبة مش شبه شخصيته.
• ضغط زائد من الأهل.
• الخوف من الفشل أو من إن المدرب يشدّ عليه.
• عدم وجود تشجيع كفاية.
• أو إن التمرين بالنسبة له “واجب”… مش حاجة بيستمتع بيها.

إزاي نخلي الطفل يكمل؟ دي خلاصة خبرة السنين

أنا بشتغل مع أطفال مختلفين يوميًا… ودي أكتر الحاجات اللي بالفعل بتنجح:

١. اسمع ابنك الأول

أنا دايمًا بقول للأهالي: مفيش طفل بيكمل في لعبة هو مش حاببها.
لما الطفل يختار بنفسه — حتى لو من اختيارين — نسبة التزامه بتزيد جدًا.

٢. المدرب له دور كبير جدًا

الطفل لازم يحب جو التمرين، ويحس إنه آمن، وإن المدرب فاهمه ومش بيحكم عليه.
لو الطفل حبّ مدربه… هتلاقيه مستني التمرين بنفسه.

٣. التشجيع مش رفاهية

كمدرب، بشوف الطفل لما أبوه أو أمه يقوله “برافو عليك”…
الطفل بيتحوّل.
مجرد كلمة بسيطة بتعمل فرق أكبر من أي مكافأة.

٤. خلّوا التمرين عادة مش مزاج

لما الطفل يعرف إن “الاتنين والسبت تمرين” — خلاص.
هيتعامل معاه كجزء من يومه، مش حاجة يقرر كل أسبوع يعملها ولا لأ.

٥. ممنوع المقارنة

أكتر حاجة بتكسر الطفل إنك تقول له: “بص صاحبك أحسن منك.”
أنا بشوف ده يوميًا… المقارنة بتخلي الطفل يهرب من الرياضة كلها.
الطفل لازم ينافس نفسه فقط.

الرياضة… بداية شخصية مستقرة وقوية

أنا كمُدرّب، شفت أطفال كتير اتغيّرت حياتهم بسبب الالتزام بالرياضة.
الطفل اللي عنده طاقة زيادة، أو عصبية، أو عدم ثقة… الرياضة بتعمل معاه شغل كبير جدًا.
وكل طفل بيدخل التمرين ممكن يكون قصة نجاح، لو لقينا له الطريقة الصح.

كلمة أخيرة للأهالي

ابنك مش محتاج يبقى “بطل” علشان نقول إنه نجح في الرياضة.
مجرد إنه يلتزم، يتطور، ويحسن شخصيته — ده أكبر مكسب.
ساعدوه، شجعوه، سيبوه يجرب… وأنا متأكد إن النتيجة هتبهركم

لمشاهدة الفيديدو اضغط هنا