الإثنين 04 يوليو 2022
رئيس مجلس الإدارة
محمد ابراهيم نافع
رئيس التحرير
محمد الصايم
تغريدة وبوست

سلامتك وأمانك أهم مليون مرة من ألف مرة من الثانوية العامة

الإثنين 20/يونيو/2022 - 10:44 م
لجنة امتحانات
لجنة امتحانات

نشر الكاتب بهاء حجازي تدوينة على صفحته الرسمية على موقع التواصل الاجتماعي “فيسبوك” بشأن امتحانات الثانوية العامة تضمنت التالي:

- الثانوية العامة مش نهاية الكون دي مرحلة من مراحل حياتك فيه بعدها كلية وجيش وجواز وطلاق ومحكمة الاسرة وخمسين خبطة في خمسين فشل في خمسين نجاح.. فمتديوهاش اكبر من حجمها.

- الثانوية العامة مش هتخليك انسان ناجح هي خطوة ع الطريق.. انت ممكن تجيب 70% وتدخل حقوق وتبقى معيد في الجامعة احسن من اللي هيجيب 98% ويدخل طب وميعرفش يكمل فيها...

- الامتحان هو اختبار لقدرة تحصيلك الدراسي في الفترة اللي فاتت. تعامل معاه ع انه كدا.. ليس الا.. دا مش غباء منك انك مجتازتوش.. خالص بالعكس.. انت ممكن تكون عبقري بس مش ضروري تفهم ان الصخور الرسوبية ترسبت بفعل عوامل كذا ولا تعرف ترتيب اخر عنصر في الجدول الدوري الحديث ولا تعرف تستخلص كحول احادي الهيدروكسيل من كحول ثنائي دفاع الزمالك... انت ممكن تكون اديب شاطر بس مش مهندس.. انت ممكن اصلا متبقاش عارف انت عايز ايه... واتزرع فيك تبقى مهندس... بس دي مش قدراتك الحقيقية.

- الثانوية العامة تجربة صعبة وبتأثر على نفسيتك.. فحاول تأثيرها ميفسدش عليك اللي باقي من حياتك.

- ليس بالامكان افضل مما كان.. او زي ما بيقولوا اللي ذاكر ذاكر.. انت عملت اللي عليك يا بطل... والمادة اللي تعدي متوقفش عندها.. هي راحت لحال سبيلها.. شوف اللي بعده. من الغباء انك توقف حياتك في نص المشوار.. كمل..

- اول ما تمسك ورقة الامتحان.. اقلبها على ضهرها واقرا ادعية وقران او اي حاجة تخليك متطمن...

- اقرا ورقة الاسئلة كلها قبل ما تبدأ تحل.. هتلاقي اسئلة مش عارف اجابتها او اسئلة مشفتهاش قبل كدا.. عادي دا بفعل التوتر.. ابدا بالسهل.. المخ بيفرز هرمونات معينة لما بتنجز بتخلي قدرتك ع الانجاز والتذكر اكبر وهتلاقي نفسك بتفتكر اللي ناسيه.

- راجع الامتحان 90000 مرة.. وقبل ما تسلم راجع.. ولو فاضل 30 ثانية راجع.. مش شبحنة انك تطلع اول واحد من اللجنة.. اطلع اخر واحد يا سيدي بس اتاكد انك راجعت كويس.

- نام كويس في يوم امتحان الثانوية العامة.. اوعي تروح مطبق.. في خلايا في المخ مش بتشتغل وانت مش نايم كويس.

- حل امتحانات كتير.

ربنا معاكم.. ويا رب تلاقوا احسن ما تتمنوا.