إلى عزيز مصر.. تحقيق السعادة للشارع التعليمى

السعادة فى مصر.. ليست تغيير أشخاص او قيادات.. السعادة ليست حوافز او مبالغ مالية اضافية تضاف للمرتبات.. مش ح اتكلم عن امور متداولة على مواقع التواصل بقدر الحديث عن ما هو واقع بالفعل.. السعادة احساس قبل المال.. الشارع التعليمى محتاج معنويات.. المعلم محتاج السعادة.. الطالب محتاج السعادة.. الاسرة محتاجة السعاده.. المجتمع بأكمله محتاج ان يشعر بالسعادة.. لان اى امور اخرى غير ذلك قد تفتح احيانا المجال لتنشيط الخلايا النايمة..
لذلك احنا محتاجين لتغيير الأفكار والاساليب الخاصة بالعمل وليس الأشخاص لان عزيز مصر دايما بيقول ( انا ح افضل ابنى واعمر ) احنا محتاجين أساليب وافكار تتناسب مع حجم البناء والتقدم المتميز ل مصر ام الدنيا.. وتحافظ على استمرارية ذلك.. 

هناك نقاط يتمنى كافة العناصر او بعض العناصر تحقيقها.. فالسعادة غير مشروطة بالمال فقط.  اه الفلوس والزيادات ليها فرحه طبعا.. لكن المعنويات محتاجين نطلع بيها لفوق.. محتاجين زيادة رضا الشارع التعليمى.. ماذا يمكن ان نقول عن ذلك الأمر ؟

١- النقطة الأولى.. 

زيادة الاعتناء بالمعلم معنويا.. كفاية ضغط عليه.. كفاية قلق ليه.. كفاية إجهاد نفسى ليه.. بجد المعلمين والمدارس محتاجه نظرة رضا من الدولة وكافة مستويات القيادات  وتوفير بعض الامور المعنوية لهم.. ح اقولكم بعض العناصر من نبض الشارع التعليمى.. 
١- نتمنى التنبيه بضرورة وقف الضغط النفسى الذى يتعرض له المعلم والموجه بسبب المتابعة وتقييم الاداء.. هم ايه علاقتهم بينا كمعلمين.. احنا مش حاملين ضغوط واعباء ضافيه علينا.. 
المعلم يتم متابعته من مدير ووكيل المدرسة والموجه والموجه الاول ورئيس القسم والحوكمة احيانا ومدير ووكيل الإدارة.. ايه الفايدة من اعداد المتابعين الكثيرة رغم وجود عجز فى المعلمين فى مدارس كتير.. مصر محتاجة التوفير يا وزارة التعليم.. رجعوا المتابعين للمدارس من اجل الترشيد للمال العام.. لان وجودهم مش قانونى.. وهاتوا لينا بطاقة وصف لوظيفة المتابعة وتقييم الاداء فى القرار الوزارىة١٦٤ لسنة ٢٠١٦.. المتابعة ليست وظائف تدريس وهنا السؤال. هل يجب وقف صرف الكادر لهم ومعاملتهم وفقا لقانون الخدمة المدنية ماليا واداريا وتقارير سنوية ؟  يا ريت التنظيم والادارة يرد. هل دا الصح والقانون.ولا فيه قانون تانى ؟
٢- وفروا لينا إداريين وعمال نظافة دايمين وليس مؤقتين او باليومية او بالموسم.. وليه إحالة مسؤولى المدارس للتحقيق بسبب النظافة. وهو م عندوش عمال. او عنده عجز عمال نظافة. يعمل ايه يعنى مسؤول المدرسة ؟

٢- النقطة الثانية:

ارضاء شباب المعلمين.. وهذا الامر ليس له علاقة بمديرية بعينها..بل هو أمر عام اصدرت بسببه الوزارة قرارا وزاريا.. 
شباب المعلمين فى مسابقة ال ٣٠ الف.  جزء منهم غاضب.. وزعوهم فى ادارات خارج اداراتهم التى يقيمون بها  .. رغم وجود عجز فى اداراتهم.. المديريات لها رؤيتها والشباب له رؤيته وامنيته.. لكن هناك شق انسانى يجب ان تراعيه المديريات ويجب على القيادة السياسية التدخل.. رجعوا شباب ال ٣٠ الف الى اداراتهم محل اقامتهم على مراحل طالما يوجد عجز.. مش معقول الام تغيب ١٠ ساعات عن بيتها وأولادها علشان الوظيفة..  ومش معقول الشاب اللى عايز يكون نفسه ويفتح بيت انه يضيع جزء من مرتبه ويومه فى المواصلات.. اتمنى من القيادات والوزارة والمحافظين ووكلاء الوزارة.. جبر الخواطر على مراحل.. الشباب محتاج من يحنو عليه ويستمع له ويلبى طلبه وفقا لما هو متاح.. صعب على الشباب نفسيا انهم يشوفوا المدرسة اللى جنب البيت فيها ناس شغاله بالحصة وهو معلم مساعد يصحى من الفجر يوميا علشان يروح يشتغل فى إدارة تانى وياخد ساعتين مواصلات.. صعب نفسيا جدا جدا..

٣- النقطة الثالثة:

الماليات مهمة جدا.. لكن نتمنى من الوزارة ان تأمر بصرف حافز تطوير التعليم شهريا ( ٨٠٠ج) مرتبات اكتوبر تم صرفها بدونه ومش عارفين ده ح يحصل فى نوفمبر ام لا ؟
..حافز التدريس ١٠٠٠ج المقرر من اول نوفمبر.. ح يتضاف مباشرة من البيرول ولا الإضافة من الادارات ؟ 
.. ضريبة كسب العمل محتاجة نظرة من الدولة ؟ تعبنا استقطاعات ضريبية.. يا ريت تزودوا حد الاعفاء الضريبى.. 
،، مشكلة اساسى ٢٠١٤ متى تنتهى.. لان هناك عدم امانه فى توصيل المعلومة الحقيقية لتلك الازمة لمسؤولى الدولة.. الازمة حقيقية تشريعية قانونية.. لكن هناك تجاهل للازمة رغم أنها فعلا واقع وليست اشاعات فيسبوك.. 
..مكافأة الى١٣٠ ج لليوم فى الشهادة الاعدادية.. هل تستمر ؟
..هل سيتم جديد فى مكافأة الثانوية والدبلومات ٢٠٢٦.. اسوة بالشهادة الاعدادية ؟ 
...مكافأة الامتحانات ال ٢٠٠ يوم.. هل يتغير الحد الادنى لليوم من ٩ج الثابت منذ عام ٢٠٠٥ الى ٢٠ج لليوم فى ٢٠٢٥.. الدنيا اتغيرت والأسعار نار.. محتاجين نظرة يا دولة..

٤- النقطة الرابعة

الشباب محتاج فرحة وقرار سياسى تعليمى معنوى.. البيوت منتظره قرار الدولة بتعجيل التعاقد مع معلمى الدفعة الخامسة لمسابقة ال ٣٠ الف معلم.. الشباب محتاج دفعة معنوية.. وتقليص فترة باقى الاجراءات المتبقية.. وخاصة انه عندنا عجز واضح فى تخصصات متعددة..
الفرحة مطلوبة يا دولة.. 

واول فرحة مطلوبة ابعاد المتابعة وتقييم الاداء من متابعة المعلم والطالب وسجلاتهم وكتبهم وعمل إحلال وتجديد بالابقاء على ٢٥% وتغيير ٧٥% لحين الغاؤها نهائيا وبدون بديل لترشيد العجز.. اعطوهم تعليمات يتابعوا البيئة التعليمية المحيطة بالمعلم والطالب فقط  ....