ماذا قالت الطالبة صاحبة اشهر فيديو للرقص داخل الفصل لـ السبورة ؟
الإثنين 07/أبريل/2014 - 06:54 م
بداية القصة ..تلقت السبورة اتصالاهاتفيا من إحدي السيدات ادعت انها إحدي أقارب الطالبة التي انفردت السبورة بنشر الفيديو الخاص بها ،وهي ترقص في أحد فصول مدرسة ثانوي ،مهددة بإقامة دعوي قضائية ضد الموقع بحجة أنه قام بالتشهير بسمعة فتاة قاصر دون علمها ،وعندما اخبرناها أن حذف الخبر والفيديو لم يعد بمقدورنا لاسباب فنية وأن الفيديو انتشر في جميع المواقع والصحف الالكترونية ، بدأت في السباب لنا ،وقالت انتم السبب ..انتم أول من نشر الفيديو..وأغلقت التليفون ،
لكنها عاودت الاتصال مرة أخري مؤكدة في هذه المرة أنها هي صاحبة الفيديو ..وأن ذلك سيضر بسمعتها ،خاصة إذا علم أهلها أو زملائها في الكلية بالفيديو .
سألنها انت في كلية ..يعني الفيديو دا قديم ؟
قالت دا فيديو له 4 سنوات
وانت عرفتي بالفيديو ازاي
قالت لي واحدة من زميلاتي اللي كانوا معايا في الفصل وقتها وكانت هي اللي بتصورنا
طاب وهي عرفت ازاي
عرفت من واحدة صحبتها مدرسة ومتابعة موقع السبورة وهي كانت خايفة تقولي عشان الموبايل ضاع منها وفيه الفيديوهات من فترة لكن بعد ما فكرت اتصلت بي وقالتلي وكانت فاكرة اني حاقدر اشيل الفيديو لاني في كلية هندسة.
هو انت في كلية هندسة يعني كنت شاطرة
ايوه انا طلعت الخامسة علي المدرسة بس ارجوكم شيلوا الفيديو بقي
طاب ازاي حد شاطر يعمل كدا في المدرسة المفروض انه رايح يتعلم فيها
علي فكرة انتم فاهمين غلط
طيب ايه هو الحقيقة ؟
دي كانت حفلة في المدرسة ..في حوش المدرسة يعني عشان عيد الأم ..وانا وشوية بنات سبنا الحفلة ورحنا في فصل كانوا بياخدوا منه التخت عشان يقعدوا عليها الناس في الحفلة ،ولما المدرسة قالت لنا كفاية ماتجبوش تخت تاني قعدنا في الفصل شوية ..ولما بدأت الحفلة والموسيقي وكدا .. قعدنا نرقص ونصور في بعض عادي يعني ..وعلي فكرة الموسيقي اللي في الفيديو دي متركبة مش هي الموسيقي اللي كنا بنرقص عليها طبعا..مش حتشيلوا الفيديو بقي ؟
هنحاول نشيله ..بس مانوعدكيش ..وبعدين اكيد ملامحك اتغيرت وماحدش هيعرفك
ايوة انا تغيرت شوية وخلعت الحجاب كمان بس انا بصراحة خايفة
قالت في نهاية اتصالها هو فيه بنت في مصر ما بتعرفش ترقص لو واحدة ما تعرفش ترقص يبقي مش من مصر ، ومش فاهمة ايه العيب في اني ارقص ، وانا زعلانه منكم جدا للمقارنة بيني وبين صافيناز الراقصة لانني افضل منها بكثير اخلاقيا وانا بنت ناس
