Advertisements

تعرف علي البطل المجهول الملك "كامس" ابن مصر والمحارب الرهيب

الخميس 10/يونيو/2021 - 03:25 م
أرشيفية
أرشيفية
 
Advertisements
نشرت صفحة تاريخ مصر القديم علي موقع التواصل الاجتماعي "فيسبوك" تقريرا عن شخصية البطل المجهول الملك "كامس" ابن مصر والمحارب الرهيب.

وإليكم نص التقرير: 

غطا التابوت اللى فى الصورة لواحد من أهم الملوك الى حكموا مصر هو بطل إبن بطل أخو بطل عائلة من الأبطال الحقيقيين الى رفعوا شعار أفعال لا أقوال ..

ده الملك "كا-مس" إبن الملك الشهيد "سقنن -رع" وأخو الملك "إيعح-مس" قاهر الهكسوس معنى كلمة "كا-مس" مولود الثور والأسماء فى الفترة دى كانت بتوحى بفترة إنتقالية لا بد فيها من فرض القوة ولمحة دينية من المعتقد الطيبى  يعنى مثلا "سقنن-رع" إسمه معناه الى بيضرب زى رع .

زوجته "أيعح -حتب" معنى إسمه القمر راض وإبنه الأصغر "إيعح مس" معنى إسمه " مولود القمر" .

من الوقائع التاريخية الشهيرة عن "كا-مس" بعد وفاة "سقنن -رع" البطل , مجلس الحرب بتاع "كامس" إجتمع وكان فى تشاور بينه وبين جنرالاته. 

مسكوا رسالة جاية من الشمال للجنوب من الهكسوس للنوبة القديمة وهى الأراضى الى فقدت مصر السيطرة عليها تماما مضمون الرسالة يلا نتوحد ضد المصريين وندمرهم ونقسم البلد ما بيننا .

"كا-مس" قال جملة مشهورة أوى : إزاى أحكم مصر وفى أسيوى فى الشمال ونوبى فى الجنوب إزاى ابقى انا ملك مصر ؟

مجلس الحرب والمستشارين كانت اراؤهم غريبة شوية هنحارب ليه ؟ إحنا طرق التجارة متزبطة ومصالحنا زى الفل .
غالبا جزء من رد "كا-مس" عليهم حذفته الرقابة لأنه لقنهم درس فى الوطنية ومفهوم الدفاع عن الوطن ككل بعيد عن المصالح الشخصية ..وأكيد لهجته مكنتش هينة ولا متسامحة تجاه المفهوم ده .

"كا-مس" قرر يحارب ووصل لتقدم كويس جدا لدرجة إنهم سجلوا إنهم وصلوا ل "حت -وعرت" عاصمة الهكسوس فى الشمال ولكن السجلات توقفت فجأة  وفجأة "كا-مس" إختفى من التاريخ .

مات ؟ يمكن ..
فى المعركة ؟ إحتمال كبير جدا ولكن الى عمله "كا-مس" كان بلا شك بداية نور الشمس لمصر كلها مات وساب وراه أم ثكلى مات جوزها "سقنن -رع" قبله ومات هو نفسه "إبنها" .

ساب كمان أخ طفل صغير على عرش مصر فى وصاية أمه الطفل ده هيبقى الملك "إيعح-مس" قاهر الهكسوس .
الى مكتفاش بإنه أنهى سيطرتهم على مصر لا ده طاردهم لأبعد نقطة ممكنة علشان يضمن نجاح ساحق وبعدها التفت على النوبة فى الجنوب بسبب الخيانة والنوايا العدوانية الواضحة أيام الإحتلال .

ومش كده وبس لأول مرة فى التاريخ يعين نائب مصرى يحكم النوبة وسماه "إبن الملك فى كوش" وإبن الملك هنا لقب شرفى يعبر عن إنه نائب للملك .

زى ما الغموض عاصر "كا-مس" فى حياته عاصره فى مماته لما وجدوا التابوت بتاعه وجواه رفات آدمية بحالة سيئة عثروا عليه فى جبانة العساسيف بالأقصر وهى جبانة الأسرة الطيبية الى جه من نسلها "كامس" الرفات السجلات ذكرت إكتشافها وبعدها إختقت من الوجود ومحدش عارف مكانها أو مصيرها .

مومياء "سقنن -رع" و"إيعج -مس" وجدوها فى خبيئة الدير البحرى الى خباها الكهنة بعد مئات السنين من وفاة "كا-مس" وخبوا مومياوات أبوه وأخوه الصغير ولكن هو مكنش معاهم وفضل مدفون فى العساسيف لسبب مجهول .

حياة "كا-مس" ملخصها الإستقلال التام أو الموت الزؤام وفعلا نفذ المبدأ ده للنهاية وكان على الوعد والعهد .

حياة الأسرة دى يتكتب عنها أعمال سينمائية وروايات مش محتاجة خيال زى كفاح شعب طيبة لعمنا نجيب محفوظ  القصة التاريخية الصحيحة أحلى بكتير واجمل وبتحكى قصة نضال مصرى أصيل علشان تراب مصر أجمل بلدن العالم  .

تحية للبطل المجهول "كا-مس" إبن مصر المحارب الشريف .
Advertisements

تعليقات Facebook