الإثنين 15 أبريل 2024
رئيس مجلس الإدارة
محمد ابراهيم نافع
رئيس التحرير
محمد الصايم
ثقافة وفن

عـايزه ايه يا شاطرة قولى..يا أم قلب وسنة فضة

الإثنين 19/فبراير/2024 - 05:26 ص
عايزه ايه يا شاطرة
عايزه ايه يا شاطرة قولى..يا أم قلب وسنة فضة

عـايزه إيه...... يا شاطـره قولي 

يا ام قلـب وسِــنه........ فضـه

عايـزه كيس كاراتيـه.. ونوجـه 

و نص حِنــه......... وربــع رَدّه

عايـزه...... كيس رابسو يا عمو

يغسـل.. القلب...... اللي صدى

عـايزه قرطاس... لب..... عاده

و قرطاسين... طيبـه.. وسماح

عـايزه.... بودره...... للسعــاده

و عــايزه.. مسحوق.... للجراح

عـايزه بمب.. جديد... وأصلي

لســه.. طـــازه...... من يومين

ينسف.. الفقـــر...... ودموعـه

من... عيــــون..... المحرومين

عـايزه.... كــــرمله.... وتوفـي

عـايزه... مصـــاصه... ولبـــانه

عـايزه... خلق... جــديده نوفي

عمـرهـا... ما داقـت.... خيــانه

عـايزه.. كاستيـلا.... وقـازوزه

و تُمن زهــره......... لـ الهـــدوم

عايزه قلب...... ف وقت عـوزه

طيبتـه........... أكتـر م اللــزوم

عـايزه.. كيلــو.... جبنــه بيضـا

و إبرتيــن... تسلـيك..... وابـور

يسلّكــوا....... النـاس المريضــه

من.. ســـوادهم..... والغـــرور

عـايزه... عسليــه........ ودوم

عـايزه... بــوزو..... وشمعــدان

عـايزه.. أفـتّـح........ كل يــوم

ألقـى... ف الناس....... الأمــان

وعـايزه.. بالبـاقي...... جيلاتي

و حلـم دافـي....... وضحكتين

عـايزه....... ما احزنش فحياتي

أو.. يعيش.. غيري..... حزين

عـايزه قلب.. برئ........ ياعمـو

وكام ضمير.... من جـوه.. رايق

ما يلاقيش... ف الدنيـا... همُُـه

مهما... عـاش.. بين.. الخـلايق

عايزه حب...... مافوهش خوف

عـايزه.. دنيــا...... بدون ديـابه

عـايزه تاني..... ياعمو.. اشوف

ضحكـة....... النــاس الغـــــلابه

 

الشاعر اللواء محمد هيكل 

  • كلمات كتبها اللواء الشاعر 

محمد  هيكل 

عضوإتحادكتاب مصروعضوجمعية المؤلفين والملحنين بمصروفرنسا  

اللواء الشاعر محمد هيكل مع الفنان محمد صبحى