الجمعة 21 يونيو 2024
رئيس مجلس الإدارة
محمد ابراهيم نافع
رئيس التحرير
محمد الصايم
أخبار الجامعات

الطالبة سارة هشام تكشف حقيقة ما جري معها في جامعة حلوان.. وتؤكد: أنا مريضة سرطان

الجمعة 26/أبريل/2024 - 10:52 م
 الطالبة سارة هشام
الطالبة سارة هشام تكشف حقيقة ما جري معها في جامعة حلوان

تنشر “السبورة” رسالة الطالبة سارة هشام المصابة بمرض السرطان عبر صفحتها علي موقع التواصل الاجتماعى والتى  تكشف حقيقة ما جري في جامعة حلوان  وإليكم نص الرسالة:


انا سارة كنت طالبه فى كليه حاسبات ومعلومات جامعه حلوان حصل معايا موقف تعسفى واضح جدا من وكيله الكليه الوكيله طلعتنى من قدام لجنتى لماده أخلاقيات المهنة (الفاينال) وانا معملتش حاجه وكنت داخله فالوقت المسموح فيه بالدخول من البوابه اللى فالدور الاول عندنا فالكليه ونزلت البدروم ودكتور منال عدت من جنبى.

 

 و انا نازله من سلم الدور الاول للبدروم وبعدين كملت ووصلت ل قدام لجنتى اتفاجأت ان الوكيله عماله تنده عليا ف روحتلها فقالتلى اطلعى مفيش امتحان فقولتلها ليه يا دكتور يعنى ايه السبب لكده مرضيتش تقول حاجه وقالتلى تعالى بعد الامتحان فى مكتب السكرتيره فقولتلها يا دكتور انا لازم امتحن الماده دى علشان ميحصلش معايا مشكله فالكليه ومينفعش اطلع وهطلع ليه اصلا قالتلى اطلعى بدل ما اجبلك واحده تطلعك ف قولتلها يا دكتور انا مريضه سرطان وجايه الامتحان وانا تعبانه قالتلى الف سلامه بكل استهزاء وسخريه وقالتلى انى كمان هعملك محضر علشان بتعملى تشويش على اللجان علشان مكنتش عاوزه اطلع علشان انا معملتش حاجه تستدعى انى اتحرم من الامتحان وكان لازم امتحن كل المواد اللى سجلتها الترم ده

 طلعت بره الكليه ولما الامتحان خلص روحت لمكتب السكرتيره

 


و لما يأست طلعت بره الكليه ولما الامتحان خلص روحت لمكتب السكرتيره وقابلت دكتور منال وسألتها ليه طلعتينى من الامتحان فقالتلى علشان كنتى ماشيه براحه ومش بتجرى قولتلها يا دكتور انا قولت لحضرتك انى مريضه ومعايا كل حاجه تثبت ده قالتلى تانى الف سلامه بكل استهزاء وقالتلى كنتى تيجى بدرى وتمشى على مهلك قولتلها يا دكتور انا كان عندى امتحان امبارح وطريقى ساعتين مع التعب اصلا مش بعرف اتنفس ولا اعمل مجهود وكمان موتسيكل خبطنى اول يوم امتحانات سكتت ومردتش.

 

 و بعدين قالتلى قدمى طلب ان الماده دى تتحفظ بأعمال السنه للسنه الجايه وهشوف اذا كان هيتوافق عليه ولا لا فقولتلها يا دكتور انا محتاجه ان المعدل التراكمى بتاعى يترفع ولازم امتحن كل المواد اللى سجلتها ومينفعش اشيل مواد علشان متفصلش علشان تعبى وانى اصلا كنت مأجله حاجات المفروض اعملها بالمستشفى علشان ابقى قادره وفيا شويه طاقه انى امتحن ف برضو صممت انى اعمل الطلب ده ف عملت الطلب وبعدها روحت ل اداره الجامعه لمكتب النائب محدش ساعدنى هناك وقالولى(السكرتاريه) ممكن تعملى طلب باللى حصل.

 

و هيروح للكليه ويردوا عليه يأما تخلى المشكله مع الوكيله ومتقدميش طلب ف قولت خلاص مش هعمل طلب علشان الوكيله متضايقش وتيجى عليا اكتر وتستقصدنى ( على اساس انها كده مكانتش مساقصدانى) وروحت لها فالاجازه مره وقولتلها طيب يا دكتور مفيش اى حاجه اقدر اعملها علشان لقدر الله ال معدل التراكمى بتاعى ميبقاش عرضه لفصلى ف قالتلى اذا كنتى عاوزه تعملى اى حاجه ف كان متاح من قبل مرور ٤٨ ساعه على الامتحان


لا والله بجد!!! هو مش كنت انا عند حضرتك فالمكتب منهاره بموت على اى حاجه تنقذنى خصوصا ان كمان حضرتك السبب وحرمتينى من الامتحان بمزاجك ولا لائحه ولا قانون يديكى الحق تحرمينى من الامتحان انا مقولتلهاش كده علشان كنت محترماها من اول ما ندهت عليا من قصاد لجنتى 


ازاى حضرتك تبقى وكيله الكلية لشئون التعليم والطلاب ومتدنيش كل الحلول اللى تنقذنى ف موقفى ده وحضرتك عارفه كل ظروفى اللى استهزأتى بيها 


يعنى ليه دكتوره تعمل كده مع طالبه وتدوس عليها بالشكل ده من غير وجه حق وان مفيش ولا لائحه ولا قانون بيقول انها تطلعنى من الامتحان وتحرمنى منه علشان مش ماشيه بسرعة! وبعدين دى ماشيه واحده مريضه ومش قادره يعنى هو ازاى فيه ظلم واستهتار بالمرض كده وكمان كان فيه ناس داخله معايا ف نفس الوقت وعندنا بالكلية مسموح ندخل الامتحان طالما البوابات مفتوحه سواء اى باب من التلاته واذا الباب اتقفل يبقى لا مينفعش تدخل وانا الحمد لله كنت دخلت والباب مفتوح هكون دخلت ازاى من عقب الباب!!!اكيد لا.


و كمان الكل مستغرب الفعل اللى الوكيله عملته معايا ومش لاقين لها مبرر انها تعمل معايا كده


و بعدين استنيت الوقت اللى وكيله الكلية قالت ان نتيجه الطلب بتاعى هيطلع فيه (اللى هو الماده تتحفظ بدرجات اعمال السنه للسنه الجايه) عرفت انه اترفض وان الوكيل قالت للسكرتيره ارفضى طلب البنت ده انا بالذات يعنى ليه برضو كل ده انا مش فاهمه 
و سكرتيره الوكيله اصلا كانت عماله تعيط علشانى وبسبب الظلم اللى انا اتعرضت له وعماله تدعيلى ومكانتش عارفه ليه الوكيله بتعمل معايا كل ده ف انا قولت انا كده اتفصلت بقا علشان المعدل التراكمى بتاعى موصلش المطلوب هو زاد اه بس موصلش للى كنت عاوزاه علشان متفصلش


بسبب انى شيلت الماده وسقطت فيها وانها متحفظتش للسنه الجايه علشان الوكيله(دكتور منال رفضت الطلب) وكمان اللى حصل اليوم ده اثر على تركيزى بشكل كبير ومعرفتش احل فالماده اللى بعدها كويس بسبب الانهيار اللى كنت فيه (نجحت فالماده اللى بعدها بس بتقدير اقل من المواد اللى امتحنتها قبل الواقعة دى) ف برضو كان عليه تأثير على المعدل التراكمى


مع العلم انى عرفت من سكرتيره الوكيله ان ما ده اخلاقيات المهنه اللى الوكيله حرمتنى من امتحانها دى كان نسبه النجاح فيها ١٠٠% وانى كنت جايبه درجه عاليه فى اعمال السنه ف اذا كنت امتحنت الماده كنت هنجح فيها وحتى اذا كنت جبت فيها اقل تقدير مع اسوء الظروف كان هيرفعلى ال معدل التراكمى وكان هينقذنى من الفصل
و لما عرفت ان الطلب اترفض روحت لمكتب العميد وقولتلهم انى عاوزه اقابل العميد وقولتلهم اللى حصل والسكرتير كان فاكر اليوم وده وكان فاكر اللى حصل فيه وكان مستغرب اللى الوكيله عملته


و قالولى اكتب طلب باللى حصل علشان العميد يشوفه علشان مكانش فاضى يقابلنى ف عملت كده وروحتلهم بعدها بكام يوم علشان اشوف ايه اللى حصل ف السكرتير قال انه قال للعميد اللى حصل والعميد كان شافنى اليوم ده وقالى انتى بنتى وفوق دماغنا ومش هتتفصلى وقال ليا اجى يوم تانى ف روحت اليوم ده لاقيته بيقول انا متأسف مش هقدر اعمل حاجه ف انهارت من العياط وقولت طب ليه يا دكتور ف قال دى اللوائح قولتله طيب انا عارفه ان دى لوائح بس اللى الوكيله عملته معايا ضد اللوائح ومأخدتش فرصتى كامله ف قالى اكتبى طلب تانى هدخله فى مجلس الكليه ونتناقش فيه عملت كده وقدمت الطلب وقدمت معاه كل التقارير الطبية وكل حاجه تثبت المرض والسكرتير قال ليا كمان اروح لحد معين فى ادراه الجامعة ف روحت هناك وقولت انى عاوزه اعمل شكوى ف كليه حاسبات (وكيله الكليه دكتور منال عبد القادر) ف اول ما عرفوا ان الشكوى عليها قالوا مش بيجى من عندهم غير المشاكل والمصايب يعنى الكليه معروفه بالظلم عندهم من بدرى طب ليه ساكتين عليها كده علشان مسنوده من بره جامد اوى وده كلام سكرتير العميد ف مش بيهمها حد ولا حد يقدر يكلمها ولا يناقشها فى قراراتها حتى العميد ف الاستاذه اللى روحتلها فى اداره الجامعه كلمت العميد وقال لها انه بيشوف موضوعى لسه فقالتلى الافضل تخلى تعاملك مع العميد وتشوفى رده هيكون ايه 


و لما روحت الكليه تانى العميد قالى لسه المجلس متعملش بس انتى خلاص معانا وسجلى المواد واحضرى وانتى حاله خاصه بسبب اللى حصل معاكى يوم الامتحان وبسبب ظروفك المرضيه بس ابقى تعالى يوم كذا برضو ف روحت اليوم اللى قال عليه العميد قالوا انه للأسف مش هينفع ارجع وخلاص هتفصل ف قولتله ليه (سكرتير العميد) قال الجواب مش عندى واطلع لسكرتيره الوكيله ولما طلعت قالتلى انا يبنتى معرفش حاجه والله واتصلت على سكرتير العميد ف قال لها بينها وبينه ان وكيله الكلية شالت الطلب بتاعى وركنته علشان ميدخلش المجلس علشان ميتناقشوش فيه علشان ميبقاش فيه فرصه ان يتوافق عليه ومتفصلش وسكرتيرة الوكيله قالتلى اللى حصل ده لما هى عرفته علشان كانت شيفانى هتجنن خلاص 


و نزلت معايا السكرتيره لمكتب العميد وقالتله اللى بيحصل فالبنت ده حرام 
ف العميد قال خلاص هيشوف الموضوع وبعدين اخدت ميعاد صريح اقابل فيه العميد ف خدنى وطلع ل وكيله الكلية واتكلموا معايا وقال انه بمجلس واحد يقدر يرجعنى الكلية تانى بس اجيله فى يوم معين حددهولى بشكل عشوائى (علشان يخلينى مروحلهمش تانى لحد ما يمضى على القراى وميبقاش ليا اى حق) 


بس انا فاليوم ده روحت ل مكتب النائب فى اداره الجامعة واصريت انى اقابله علشان حسيت ان العميد مش مراعى ظروفى وعمال كل شويه ينيمنى ف قولت اروح للنائب احتياطى بس النائب مرضاش يقابلنى والسكرتيره كانت عارفه الموضوع وقالتلى اكتبى طلب بيه ف كتبت الطلب والسكرتيره اخدت رقمى علشان لما النائب يكلم العميد تعرفنى ايه اللى حصل ف استنيت كام يوم ومحدش اتصل ف روحتلهم فى اداره الجامعة تانى ف مكتب النائب ف قالتلى السكرتيره انه مكانش فاضى خالص ومكلمتوش بالموضوع ف مشيت وبعدها بكام يوم اتصلت بيا وقالت ان العميد قال ان الموضوع منتهى ومش هينفع ارجع قولتلها ازاى وانا مأخدتش الترم اللى فات كامل واللى عملته الوكيله معايا هو السبب ف قالتلى خلاص ماشى انا هبلغه(هتبلغ النائب)و بعدها بكام يوم اتصلت بيها ف عرفت ان الطلب هيروح الكليه والعميد هيرد عليه بس سبحان الله لحد انهارده مفيش رد على الطلب اصلا وسكرتير العميد قال ليا ان فيه حاجه بيبقى اسمها متابعه يعنى بيتابع الطلب مع ادراه الجامعه علشان يوصلهم الرد ف قال ليا ان العميد مبلغهوش برد يكتبه ويوصله لإداره الجامعه ف معنى كده ان العميد مبصش فالطلب اصلا


و كمان كنت فى يوم روحت ل دكتور منال مكتبها علشان اقابلها ف رفضت انها تقابلنى وقالت مش بتقابل طلبه دلوقت فقولت ل استاذه وفاء السكرتيره انى عندى معاد مستشفى والمستشفى بعيده اصلا ولازم الحق اروح اعمل تحاليل فقالتلى هى مش عاوزه تقابلك وسألتها حتى اذا استنيت الوقت اللى بتقابل فيه الطلاب فقالتلى اه


و بعدين اهلى كانوا مش مستوعبين ليه دكتور منال بتعمل معايا كده  ف حد من قرايبنا راح ل مسئول عندنا فى الكليه قالتله هو ازاى فيه ظلم كده ف قال لها انا مقدرش اتدخل علشان محدش بيقدر يقول لها كلمه وانا مش عارف بتعمل مع البنت كده ليه وقال انه مش عارف يدافع عنى حتى علشان ممكن ترد عليه بكلام مش كويس!!و كمان قالوا ان وكيله الكليه مش بتحترم حد خالص


و بعديها بابا كلم صاحب ليه يعرف دكتور اسامه العميد ف صاحب بابا كلم العميد والمكالمه معايا متسجله بيقول فيها ان الوكيله بتحبنى ومعتبرانى بنتها!!!بجد بتحبنى ومعتبرانى بنتها اومال اذا كنت عدوتها كانت هتعمل فيا اى وبالمنطق هتطلعنى من الامتحان ليه وانا داخله فالوقت المسموح وترفض طلب الماده ليه وتشيل الطلب علشان ميتناقشش فالمجلس ليه وتأثر على العميد علشان يغير موقفه ليه ويفصلنى


و كمان لما صاحب بابا كلم العميد قاله انى اخدت ٦ فرص علشان ال معدل التراكمى بتاعى يزيد بس سبحان الله الواحد بيخلى اللى ظلمه يقع قدامه فالكلام علشان يكون طوق نجاه ليه علشان وكيله الكلية كانت قالتلى لما كنت ف مكتبها ف مره انى اخدت ٦ فرص وانا اصلا حسبتهم وبأثبات من كارت الطالب فالكليه انهم ٤ والخامس اللى حصل فيه المشكله يعنى معنى كده ان العميد اصلا كل ده مدرسش حالتى وبيقول الكلام اللى دكتور منال بتقوله وبتأثر عليه بيه!!


يعنى دكتور منال بتقول كلام مش صح علشان تكمل ظلم فيا والعميد مقتنع بكلامها ومش بيراجع وراها طب ازاى ده قرار فصل وتدمير مستقبل وضياع تعب سنين مش لعب عيال ميستحقش من العميد انه يشوف كارت الطالب بتاعى ويشوف كلام الوكيله صح ولا غلط!؟
كمان الوكيله مستكفتش بكل اللى عملته كمان حرضت شئون الطلبه عندنا فالكليه بأنهم ميساعدونيش ولا يدونى اى معلومه تفيدنى وقعدوا يزعقولى وطردونى وقالولى ان كلامك مع دكتور منال او العميد
و بعدها روحت ل امين الكليه علشان اسأله عن بار كود قالولى عليه فالبريد علشان اشوف جواب الفصل راح فين علشان كل ده لسه موصلناش البيت واحنا كننا محتاجينه ف امين الكليه قال مقدرش اديكى حاجه علشان كده هتعرض للتحقيق اللى هو للدرجادى مش عاوزه حد يفيدنى بحاجه فالكليه ومهدداهم؟!


و كمان صاحب بابا اللى كلم العميد قال ل بابا ان دكتور منال سلطتها كبيره وأذت ناس كتير وممكن تأذينى ف بابا خاف عليا بس انا عملتلها اى علشان تأذينى انا كنت عاوزه حقى ومتفصلش علشان انا كان من حقى اخد الترم ليا كامل وميحصلش فيا كل ده
و معايا اثباتات من طلبه كتير كانوا بيحاولوا يساعدونى وناس متخرجه كمان انها بتيجى على ناس كتير وبتأذى ناس كتير وكمان بتمشى بالوسايط على مزاجها وكل حاجه كتبتها فالبوست ده ف انا معايا ليها اثبات ومكالمات مسجله وتسجيلات وطلبه شاهده باللى حصل وطلبه شاهده ان دكتور منال بتظلم الطالب وبتدعى محبتهم واثبات كمان انها اذت ناس كتير واثبات انها بتمشى بالوسايط على مزاجها وبيمشوا الدنيا بالمصالح.


بس اتفاجئت من كام يوم انه خلاص مضى على جواب الفصل ف عرفت انهم كانوا بينيمونى ويهدونى على ما القرار يطلع من جامعة حلوان  و يمضوه علشان مروحش اشتكيهم على  اللى بيعملوه ده وبجد الايام اللى فاتت كانت جحيم فى حياتى  حسبى الله ونعم الوكيل 


و اسفه جدا انى طولت عليكم بس هو الموضوع طويل وكنت عاوزه اوصل لكم كل حاجه حصلت معايا في جامعة حلوان  بالظبط