فتحى سليمان يكتب.. بعد زيادة اسعار البنزين

بعد زيادة اسعار البنزين

الكاتب الصحفي فتحي سليمان، مدير تحرير موقع القاهرة 24، يكشف تفاصيل زيادة اسعار البنزين وأثرها المباشر على حركة السوق وتكاليف المعيشة اليومية، ونشر عبر صفحته على فيس بوك بوست بعنوان “بعد زيادة اسعار البنزين” يوضح فيه تأثير الزيادة على المواطنين وحركة السوق.

بعد زيادة اسعار البنزين

طبيعي جدًا إن كل حاجة هتزيد المواصلات هتزيد الأكل هيزيد الشاي على القهوة هيزيد ويمكن السلام نفسه يبقى بفلوس قريب

وفي الحالة دي لازم نتكلم بصراحة شوية عن التكافل الاجتماعي مش التكافل اللي بيتكتب في البيانات الرسمية

لأ

التكافل الحقيقي اللي الناس الغلابة محتاجاه

أي رجل أعمال عنده مال وفائض رزق ويقفل على فلوسه كأنها سر حربي وما يطلعش منها للي محتاجين آثم.

وأي صاحب شركة يشوف الدنيا بتولع حوالينه والناس مرتباتها بتتبخر قبل نص الشهر وما يراجعش نفسه ويراعي ربنا آثم وفلوسه شبهة حرام.

وأي وزير أو مسؤول شايف البلد كلها بتشد تعبانه وماشيه بالزق وهو لسه عايش في حفلات وموائد وعزومات فطار وسحور بتكلف الدولة مليارات وكأننا في موسم مهرجانات ده مش بس غلط ده لازم يتسأل ويتحاسب.

وياريت كمان الوزارات والهيئات ومؤسسات الدولة تبطل العادة الغريبة اللي اسمها إفطار هيئة كذا وسحور مؤسسة كذا.. بالملايين كل يوم.

عزومات تتعمل باسم العمل العام واللي يحضرها في الآخر مجموعة مسؤولين بيعزموا بعض وكل واحد جايب معاه محاسيبه وصحابه وقريبه.

لا المواطن بيستفيد

ولا مشكلة اتحلت ولا البلد اتقدمت خطوة واللي تاخذهم من جيب المواطن بنزين وأسعار نضيعهم في الفشخرة والعنظزه.

وأي بذخ مؤسسي أو صرف في غير محله اسمه فساد حتى لو اتغلف بكلام كبير.

هي نفس حكاية الراجل اللي يستلف عشان يعمل عزومة فاخرة ويبان قدام الناس إنه تمام

البلد مش ناقصة فشخرة كدابة.. البلد محتاجة حكمة ورحمة وشوية إحساس بالناس