إيقاظ الخلايا النايمة..

الخلايا النايمة او الجيل اللى نجح المعزولين فى زرعهم داخل الجهاز الادارى فى سنة وجودهم السودا.. الجيل الخفى اللى مش بيعمل اى حاجة سوى بث الاحباط واضعاف الروح وتسخين العقول.. لحين وصولهم لهدفهم.. اللى مش ح يوصلوا ليه لأن الأمن بصراحة صاحى جدا وعنيه مش بتنام.. لكن بيصبر لغاية النهاية..  لكن زى م الأمن بيحط الجميع عند حجمه الطبيعي.. نتمنى من أصحاب القرار عدم الإثقال على الأمن ووضع حلول لازمات كتير تعطي تلك الخلايا فرصه الاثارة وزيادة الاحتقان..

هل هناك أزمات؟ مش ح اقول أزمات بقدر م اقول احنا محتاجين إجراءات وتطبيق كلام عزيز مصر ( احنا م عندناش وقت ) لان هناك بعض التصرفات بتختبر مرحلة صبر الناس اللى رغم زعلها بتصبر حبا فى استقرار الدولة  .. بتصبر حبا فى شخص واحد عزيز وغالى وهو عزيز مصر.. ولولا حبه وغلاوته محدش ح يصبر.. وبقولها تانى حب الناس ليه هو السبب الأول للصبر على اى صعب..

ونتحدث فى نقطة يتحدث عنها الجميع.. وهى نقطة الأجور.. النقطة دى صعبة جدا والحديث فيها مخاطرة.. لكن نقول.. الدولة رفعت الحد الأدنى للاجور من ٧٠٠٠ ج  الى ٨٠٠٠ ج يعنى حوالى ١٥%  وخد بقى عندك حصل ايه 
١- الدولار زاد من ٤٧ ج الى ٥٤ ج بنسبة ١٥%.
٢- اسعار المحروقات زادت بنسبة لا تقل عن ١٥% 
٣- التضخم زاد فى فبراير وكمان لسه بيانات مارس..

ومش ح اتكلم عن الكهرباء والمواصلات.. او مطالب شركات المحمول بالزيادة فى اسعار الخدمات او اى زيادات محتملة.. لكن الموظف ح يتحمل ايه ولا ايه.. هل هى دى الزيادة التاريخية اللى اتوعدنا بيها جميعا ؟  طب هل زيادة المرتبات دى ح تدعم القدرة الشرائية للمواطن الموظف ؟

وندخل من المسار العام  على بيتنا وزارة التعليم ومسار آخر  ونقول حاجات اخرى بتنشط الخلايا النايمة  
١- ليه م نحولش أموال صندوق الجزاءات الى وزارة المالية ونلغى صندوق الجزاءات ونعتبر اى استقطاع بسبب الجزاءات إيرادات دولة.. مش معقول الدولة تستلف وتتداين واحنا نعمل بحصيلة الجزاءات قروض حسنة وكمان ايه هى لائحة صناديق الجزاءات وكيفية صرف اموالها ؟ الدولة اولى نخفف عنها.. 
٢- عندك عجز فى المعلمين والاخصاءيين.. طب م تلغى المتابعة وتقويم الأداء وتحولها لقسم زى باقى الاقسام وتكلف الموجه الفنى بالمتابعة الادارية الى جانب عمله الفنى وندربهم على ده ونوفر للدولة كتير.. تقريبا نصف مليار سنويا ع الاقل.. واخر اليوم يقوم الموجه بتسليم تقرير المتابعة لمكتب مدير الادارة او مدير المتابعة..
٣- هل هناك غضب ومطالب لدى الموجهين الخاضعين لقانون ١٥٥ ؟ 
نحكي ٣ مواقف وانتو قرروا 
اولا الموجه هو المشرف الفنى على المعلم والطالب ويكتب تقرير فنى عن أداء المعلم ويشارك فى كتابة التقرير  السنوي عن للمعلم.. هل معقول حرمان الموجهين من صرف حافز التدريس.. هو الموجه اصلا كان مدرس وانتو احتجتوه ف التوجيه ؟ طب لو الموجهين قرروا جماعيا التنازل عن التوجيه والعودة للتدريس ح تعملوا ايه ؟

ثانيا:- جات الاجازة بسبب الأحوال الجوية وبينما المعلم والطالب فى اجازة.. الموجه م اخدش اجازة.. ليه.. لانه تبع ديوان الادارة ؟

ثالثا:- جه قرار العمل اون لاين فى كل يوم  احد بشهر أبريل.. قالوا الموجه يشتغل يوميا لان العمل محتاجه والمدارس شغاله يوميا.. 
يعنى الموجه لا بياخد حافز تدريس زى المعلم  ولا بيرتاح ايام الراحة زى اللى بيرتاحوا..
٤- السنة اللى فاتت تم احتساب يوم العمل فى الشهادة الاعدادية ب ١٣٠ ج.. هل تكرر ده هذا العام ؟ 
٥- هل سيتاثر الإقبال على امتحانات الشهادات العامة بسبب التضخم  .. واقول جزء كبير من المعلمين اساسى ٢٠١٤ اللى بيحسبوا عليه قيمة المكافأة لا يزيد عن ٤٠٠ج يعنى اليوم بنسبة ٧% ب ٢٨ ج مكافأة  .. ال ٢٨ ج دى تعمل ايه بالظبط ودا قبل الاستقطاعات.  مين يروح يشتغل علشان ٢٨ ج وحتى لو ضربناها فى ٣.. ح يطلع ٨٤ ج.. ف ح تعمل ايه ٨٤ ج  ومنها لسه استقطاعات.. ف شوفوا حل مبكر ل ده..
٦- هل الترقيات ستقتصر على دفعة ٢٠٢٠ ام سيكون معهم دفعة ٢٠٢١.. لان ترقيات دفعة ٢٠ و٢١ حق قانونى حاليا لانهم اتموا المدة البينية للترقى  وهى خمس سنوات..
٧- عجز العمال والاداريين مطلوب حل سريع عاجل له.. دواوين المديريات والادارات والمدارس محتاجه والكل يعانى..
٨- خطوات التعاقد مع معلمى المرحلة الخامسة مطلوب تكون اسرع من كدا..