السبت 24 فبراير 2024
رئيس مجلس الإدارة
محمد ابراهيم نافع
رئيس التحرير
محمد الصايم
مقالات

جهاز فني أجنبي جديد و10 صفقات فى القلعة البيضاء

مغارة علي بابا والفانوس السحري في الزمالك..!!

السبت 03/فبراير/2024 - 01:55 ص

بعد فك القيد والتعاقد مع جهاز فني أجنبي جديد و10 صفقات... جيبت الفلوس منين يا مجلس الزمالك في 100 يوم بس ؟.. سؤال وجيه ومنطقي جدا وأكيد يشغل بال الكثيرين.... ولكن

 

** قبل أن تسأل جيبت الفلوس منين يا مجلس في 100 يوم بس... اسأل هي الفلوس دي كلها ممكن تيجي إزاي في هذا الوقت القصير جدا وفي ظل ظروف الأزمة المالية العنيفة اللي بيعاني منها النادي ومعروفة للجميع ؟

 

** أنا والله بعتبرها إعجاز وليس انجاز فقط..!! يمكن علشان عارف شوية تفاصيل فيها... وياريتني ما كنت عارف..!!

 

** انت إزاي قدرت توفر 3 مليون دولار لفك القيد في ظل الأزمة الاقتصادية والدولارية التي تعاني منها مصر والجميع يعلمها.. ومين رأس الحربة الأساسي في حل هذه الأزمة الصعبة جدا ؟... وكمان جهاز فني جديد وكمان 10 صفقات جديدة... يعني ضربة ثلاثية في شهر يناير ( فك قيد + صفقات + جهاز فني جديد ).

شكك البعض ولكن 

** أنا واحد من الناس كنت واثق إن كل ده هايحصل وراهنت عليه في جميع البرامج اللي خرجت فيها طوال الفترة الماضية،، رغم تشكيك البعض وأمنيات البعض الأخر بعدم حدوث ذلك..!!

 

** طاب أعضاء مجلس الإدارة ساهموا من أموالهم الخاصة لحل هذه الأزمة.... طبعا وقولا واحدا حصل وبمبالغ متفاوتة

 

** طاب فيه رجال أعمال زملكاوية ساهموا في توفير كل المبالغ دي... طبعا وقولا واحد حصل وبمبالغ كبيرة جدا كمان

 

** طاب ممكن يكون فيه قرض اتاخد علشان يساعد في حل الأزمة دي... أيوا ممكن يكون فيه قرض... بس الأهم من القرض هو انت أخدت القرض إزاي ؟ وايه الصعوبات اللي واجهتك علشان تاخد القرض؟ وحليت الصعوبات دي إزاي وإمتي في ظل ضغط الوقت معاك؟

 

** دي الـ 3 حاجات اللي ممكن تخليك توفر كل هذه الأموال في هذا الوقت القصير، لأن مفيش فانوس سحري والا مغارة علي بابا والا فيه لهو خفي ممكن يدفعلك كل المبالغ الكبيرة دي..!!

مبالغ وهمية

** أما قصة المبالغ اللي بينشرها البعض عن قيمة الصفقات وعقد الجهاز الفني الجديد فهي مبالغ وهمية... ويكفي إنك تعرف بأن راتب الجهاز الفني الجديد كله لـ الزمالك لم يصل لراتب أي مدير فني أجنبي سابق للفريق على مدار السنوات الماضية، وعقود اللاعبين الجديدة كانت محدده بسقف معين حدده مجلس الإدارة ومع بعض اللاعبين تم تحمل ما هو فوق السقف من بعض أعضاء المجلس ورجال الأعمال الزملكاوية..!!

 

** طبعا كلامي ده مش هيعجب الجماعة اللي بالي بالك.. بس هي الحقيقة دايما بتوجع اللي مش عايز يصدقها..!!

 

** ممكن يكون فيه قطاع من جمهور الزمالك ميهمهوش يعرف التفاصيل دي لأنه شايف نتيجة على الأرض خصوصا فيما يتعلق بفريق الكرة،، بس فيه ناس يهمها تعرف علشان المضللين والمغرضين..!! وأنا واحد من الناس اللي بطالب دايما بضرورة كشف كل هذه الحقائق والتفاصيل للجماهير علشان ده حق الجمهور على المجلس... !!

 

... وأخيرا... لاحظ أنا مذكرتش أي إسم في كل الكلام السابق،، بس والله نفسي أقول كل واحد عمل ايه بالظبط علشان الناس تعرف بجد مين بيحب الزمالك بالأفعال وليس الأقوال ؟