ام الشهيد على على السيد: استودعته عند ربنا
الجمعة 22/مايو/2020 - 10:47 م
قالت ام الشهيد على على السيد البطل الذى استشهد فى كمين البرث بشمال سيناء، فى عام 2017، والذى راح ضيحته العقيد اركان حرب الشهيد احمد المنسى.
واضافت ام الشهيد على فى لقاء لها على قناة اكسترا نيوز، انها استودعت ابنها البطل عند ربها، موضحة انه مات وهو يدافع عن زملائه وضحى بحياته من اجل الوطن ومن اجل انتصار الجيش المصرى على التكفيريين.
وقالت "ابنى حبيبى يا نور عينى بيضربوا بك المثل.. طبعا دا انا ام البطل".
وما زالت احداث موقعة البرث او كمين البرث تلقى بظلالها على الشعب المصرى.. خاصة بعد استشهاد القائد منسي.. والذى قام بدوره الفنان امير كرامة باقتدار فى مسلسل الاختيار.
ومن تفاصيل المعركة جندى مقاتل علي علي.. شخص من الجمالية كانت شغلته انه بيعمل اسطمبات من الجبس ويبيعها.. شخص سنه لا يتجاوز ٢٠ عاما .. تخيلو بسببه الارهابيين مقدروش يوصلو للدور التاني في المبني في الوقت اللي كان ٧٠% من قوة الكمين استشهدت
تحدث عنه ملازم اول عبدالعزيز محمد محسن ضابط الحرب الالكترونيه في كمين البرث احد الناجين من المعركة، قال "كان اي حد يقع مصاب او يستشهد كان بيشيله ويدخله غرفة وهو كان واقف يحرسها علشان محدش من الارهابيين يقدر يوصلهم..
واضاف ملازم اول عبدالعزيز ان علي علي فضل واقف على مطلع السلم فى الدور التاني واى حد يقرب كان بيقتله . لدرجة انه اتصاب ووقع على بطنه ... وهو واقع على بطنه ماسك السلاح وبيزحف ومكمل ضرب على اللي بيحاول يطلع ..
واوضح ملازم اول "وهو خلاص بيموت كان طالع واحد من الارهابيين.. راح قاتله برضو بعدها هو استشهد".. تخيلوا الشخص ده كان راعب الارهابيين وعطلهم لحد ما وصل الدعم.. ولولا هو كان الارهابيين وصلوا للدور التاني وقتلوا كل المصابين وصلوا القائد المنسي ومثلوا بجثته ...تخيلو المجند علي علي استشهد باصابته بـ ٣٠ طلقه..
تخيلو ان شخص بيموت علشان يدافع عن جثمان اشخاص ميته او شبه ميته .. تخيلوا ٣٠ طلقة وهو صامد بيقتل فيهم لحد قبل ما يستشهد بثواني يقتل اخر واحد منهم كان بيحاول يطلع الدور التاني .. ده شخص طبعا محدش يعرف حكايته او سمع عنه .. اسمه لم يذكر سوى في اغنية قالو ايه علينا .. في مقطع علي علي من الشجعان .. بس للاسف محدش كان يعرف هو مين علي علي.. ربنا يرحمه ويدخله فسيح جناته..
