توفير عملات للدولة
التوفير للدولة ودعم الدولة واقتصادها حلم عام.. مش لازم اكون مسؤول علشان افكر ف الدولة او كيفية الدعم والمساندة والحفاظ عليها.. ام الدنيا مصلحتها فوق الجميع وأهم من الجميع.. ليه م نتكلمش ونقول افكار نساعد بيها الدولة.. الاقتصاد واسعار العملات هى موضوع يشغل الجميع.. ليه م نفكرش فى أمور إجراءات تدعم الدولة وتقلل العبء.. ونتكلم عن نقاط قد تكون مفيدة
منها:
١- العملات الأجنبية متوفرة والحمدلله اقتصادنا تعافى لكن ممكن نعمل فكرة جديدة نزود بيها حسن ادارة العملة وترشيد استخدامها.. ايه هى ؟
المصانع كثيفة الاستخدام للطاقة زى الحديد والأسمنت والأسمدة واللى بتصدر جزء من إنتاجها للخارج.. ليه م اعملش توافق معاهم انك تستورد شحنات غاز لمصانعك عن طريق الدولة وتدفع ثمنها بالدولار او نعمل اتفاق معاهم انهم يدفعوا ثمن الطاقة اللى بتستهلكها مصانعهم بالدولار الوارد من ايرادات التصدير وليس بتبديلهم العملة من البنوك.. ف ليس من المعقول ان الدولة توفر العملات لاستيراد الغاز وباقى مشتقات الوقود والمصانع الكبيرة تستهلك وتدفع ثمن الطاقة بالجنية ( والله اعلم ).. واحنا كدولة ممكن نعمل عرض كويس ليهم.. يدفع ثمن الطاقة بالدولار الوارد من حصيلة تصديره مقابل خفض فى ثمن الطاقة اللى بتستهلكها تلك المصانع.. الكلام ده م يوفرش مليار دولار على الاقل ؟
٢- فكرة تانى.. ليه م نفكرش فى الزام الفنادق السياحية بتركيب خلايا طاقة شمسية ونوفر كهرباء وطاقة لامور اخرى.. اللى بنى الفندق.. هل صعب عليه تركيب خلايا طاقة شمسية ؟
كدا ح نوفر استهلاك طاقة ونوفر استيراد غاز وممكن نعمل ليهم قروض ميسرة لدعمهم فى ذلك الأمر؟
٣- اتخاذ قرار بتقليص عدد أجهزة التكييف فى المصالح الحكومية ل ٥٠%.. وسحبها للمخازن.. لضمان جدية عدم التشغيل.. فيه ناس ناس مش بتشغل مروحه ف بيتها وتلاقيها برا البيت بتدور على الهوا الساقع.. دا ح نلاقيه الفترة الجاية بشدة.. وتلاقى الناس متكدسة ف الأماكن المكيفة او اللى فيها تهوية عالية.. الكلام ده ممكن يوفر جزء من كثافة استخدام الطاقة والكهرباء فى الصيف
٤- ليه الدولة م تفكرش فى تحويل العمل ببعض مدارس وزارة التربية والتعليم ل العمل بالطاقة الشمسية والتمويل يكون من خلال صندوق المشروعات وان يكون ترخيص انشاء اى مدارس خاصة جديدة مقابل استخدام الطاقة الشمسية
٥- ليه م نعمش حوار مع المستثمرين المصريين ونشوف انتو بتستثمروا خارج مصر ليه.. م تيجوا بلدكم.. ايه المعوقات واحنا نتناقش فيها ؟ وكذلك حوار مع كبار المودعين بالخارج .. تعال نتناقش فلوسك برا بلدك ليه ؟
٦- دعم الاستثمار فى التعليم خاصة ما قبل الجامعى.. امر مهم جدا ومطلب استثمارى.. ليه م نعملش ليه تيسيرات بحيث يصبح تراخيص الإنشاء وعدد الفصول من الهيئة الهندسية للقوات المسلحة وترخيص التشغيل الادارى من وزارة التربية والتعليم.. وكدا نخلص من جزء من الروتين.. مع تحقيق مرونة لزيادة تراخيص المدارس الخاصة الحالية.. تعال عندنا الأمان فى مصر.. تحيا مصر..
